Nalunaarasuartarnermut aqutsisoqarfik sumiginnaasimavoq
Nunani tamalaani akigitinneqartunut sanilliutissagaanni nunatsinni 50 mbit/s IP-transit Committed Bandwidth malillugu akigitinneqartoq annertuallaarsorineqarpoq. Qaammammut 25.000 koruuninik akeqartitsineq naapertuilluarnerusimassasorineqarpoq.
- Immikkoortitsinnginnissamik inatsimmi piumasaqataasoq malinneqarsimanngilaq. Imaatigut kabelip atornissaanut Tele Greenlandip akiliutaa atuisunut allanut sanilliullugu annikinneralaarsuuvoq. Eqqumaffigineqarsimanngilarmi imarpik ikaarlugu attaveqaatip atorneranut Tele Greenlandip iluanaaruteqartarnera. Taamaammat nalunaarasuartarnermut aqutsisoqarfiup akigitinneqartussatut aalajangiussaa tunngavigalugu uagut aningaasarsiorsinnaanngilagut, Peter Engsig-Karup oqarpoq.
Tele Greenlandip siammarterinermut atortorissaarutaasa atornerinut akiliutip saniatigut nuna tamakkerlugu pilersuisussaanermi amigartoorutit ilanngullugu atuisut akilersorpaat, tamannalu tunngavigalugu attaveqarnermut aqutsisoqarfiup akimik aalajangersaanera kukkunertut isigineqarpoq.
- Attavinnik atueqatigiinnermut akigitinneqartoq quleriaammik akisuallaarpat pilersuisussaatitaanermut akileeqataassutigisarput quleriaammik annertuallaarsimassaaq. Tamanna tunngavigalugu Tele Greenlandimut unammillerniarneq ajornavippoq taamaasiussaguttami atortut aserfallatsaalinissaannut aningaasassaqanngilagut. Atortut ukiut pingasut ingerlaneranni pisoqaavallaalersarput aningaasarsiorsinnaanngikkuttalu atortut taarsersorsinnaanngilagut, Peter Engsig-Karup KNR.gl-mut oqarpoq.
Nalunaarasuartarnermut aqutsisoqarfiup aalajangernera ilumut naapertuunnersoq akilu appartariaqarsorigaanni eqqartuussivimik naliliisussatut suliakkinneqarsinnaavoq
- Eqqartuussivimmut suliassanngortitsisinnaaneq suli isumaliutigaarput. Maanna takusinnaasagut malillugit Tele Greenlandimut nallersuussinnaasunik atugassaqartinneqanngilagut taamaattumillu unammillersinnaanata. Tamanna atuutiinnassappat IT atorlugu Kalaallit Nunaanni ineriartorneq eqqugaasussaavoq, Peter Engsig-Karup oqarpoq.
