Tele kisermaassissussaatitaanngilaq

Telestyrelsemi aalajangerneq tunngavigalugu internet atorlugu sullissiniartut allat Tele Greenland Nuummi unammillersinnaavaat. Maanna Nuuk Skynet A/S aamma INU:IT Nuummi internet atorlugu sullissilernissamik soqutiginnipput.

Ukioq ataaseq sinnerlugu Nuuk Skynet A/S aamma Tele Greenland isumaqatigiinngissuteqarput Nuuk Skynet Tele Greenlandip atortuinik atuisinnaalissappat akia pillugu. Maanna Telestyrelsep akiusussaq aalajangerpaa maannalu unammilleqatigiittoqarsinnaalernera innuttaasut iluaqutigisinnaalerpaat.

- Pisussaaffipput naapertorlugu internetimik atueqatigiinnerup akia aalajangersimavarput. Nuannaarutigaarput aamma Kalaallit Nunaanni naligiimmik unammillertoqarsinnaalermat. Atuisut tamanna siullermik Nuummi iluaqutigissavaat siunissarlu ungasinnerusoq isigalugu nuna tamakkerlugu malutigineqarsinnaalissaaq. Aki aalajangiussimasarput tassaavoq annertuumik attaveqarnermut akigitinneqartussaq sullissisullu suli annertunerusumik attavilerneqarnissamik pisariaqartitsissappata tamatuma akia aamma iluarsiumaarparput, Telestyrelsemi pisortaq Nicolai Odgaard Jensen oqarpoq.

Telestyrelsep aalajangernera ukiuni pingasuni atuuttussaavoq tamatumalu kingorna nalilersuisoqassalluni. Maanna qaammammut ataatsimut 50 mbit-imik atuineq 244.631 koruuneqartussatut aalajangiiffigineqarpoq.

- Ukiut pingasut qaangiuppata neriuutigaarput Tele Greenland allallu sullissisut atueqatigiinnerup akia pillugu nammineq isumaqatigiissinnaajumaartut. Tamanna pisinnaanngillat akimik aalajangersaaqqittariaqarsinnaavugut. Siunertaasoq tassaavoq maanna attaveqarnissamut periarfissap pitsaanerpaamik atorneqarnissaa. Maanna 10 gigabytes taamaallaat atorneqarpoq. Kalaallit Nunaallu tamaat isigissagaanni 350 gigabytes taamaallat pisariaqartinneqarpoq. Taamaattumik attaviit annertusinissaannut suli periarfissaqakutsoorpoq, Nicolai Odgaard Jensen oqarpoq.

Tassa imaappoq ullumikkut atorneqartunit 10 gigabytesinit annertunerujussuarmik suli periarfissaqartoq. Attaveqarnermulli atorneqartoq assersuutigalugu marloriaatinngortissagaanni tamanna 500.000 euro-mik akeqarpoq, tamannalu Tele Greenlandip aningaasarsiornerannik ajalusoortitsinavianngilaq.

- Attaveqarnissamut periarfissat tunngavigissagaanni flat-rate-imik atuisoqalersinnaalluarpoq. Akip aalajangersornissaannut tunngavissat assigiinngitsut aalajangersimavagut. Atuisinnaasut najoqqutarissagutsigit imaatigut kabelip pisinnaasaata 9 - 10 procentia taamaallaat atussavarput. Taamaammat sullissisut sukkanerusumik annertunerusumillu attavilersuisinnaalluarput, taamaasippallu Tele Greenlandip kisermaassisuunera kipitinneqarsinnaavoq, Nicolai Odgaard Jensen KNR.gl-mut oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat