Nuuk sapaatip akunnerani mattunneqartoq
Illoqarfiit pingaarnersaannit Nuummit aallarniaruit juunip ulluisa 22-aatinnagu aallaqqusaanngilatit.
Tunillaassortunik nappaalanersuaqarneranut ataatsimiititaliarsuup Nuummiit nunatsinni najugaqarfiusunut allanut angallannerit tamarmik inerteqqutaalernissaat aalajangerpaa.
Marlunngornermi tusagassiortunik katersortitsisoqarmat Nuup matunera qanoq sivisutigissanersoq Naalakkersuisut nakorsaanerulluunniit ullulersinnaanngilaat, maannali ulluliisoqarpoq.
Paasissutissat:
Covid-19-ip tuniluussinnaanera pissutigalugu Nuup (Nuussuup Qinnguttalu) matuneqarnissaat pillugu Tunillaassortunik nappaalanersuaqarneranut ataatsimiititaliarsuup peqqussutaa:
- Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi, § 7, imm. 1 naapertorlugu aalajangersarneqarpoq:
- Nuummiit (Nuussuarmiit Qinngutsinniillu) Nunatsinni najugaqarfinnut allanut aallarsinnaaneq 22. juni 2021 tikillugu inerteqqutaalerpoq.
- Kalaallit Nunaanni Politimesteri Kalaallit Nunaanni Politiinut attuumassutilinnik inuiaqatigiinnullu pingaarutilinnik sulialinnut inerteqqummit immikkut akuersissuteqarnissamut piginnaatinneqarpoq. Issittumi Sakkutooqarfiup pisortaa Illersornissamut tunngasunik inuiaqatigiinnullu pingaarutilinnik sulialinnut inerteqqummit immikkut akuersissuteqarnissamut piginnaatinneqarpoq.
- Nunatta Nakorsaanera inuiaqatigiinnut pingaarutilinnik sulialinnut allanut tamanut inerteqqummit immikkut akuersissuteqarnissamut piginnaatinneqarpoq.
Paasissutissarsiffik: Tunillaassortunik nappaalanersuaqarneranut ataatsimiititaliarsuaq, juunip 15-iat, 2021
Illoqarfimmit aallartoqarsinnaannginnerani inerteqqutaasimasutulli illoqarfiup innuttaasui Nuummiiginnartussaatinneqarput, taakku umiatsiamik angalaarsinnaapput qaqqamullu pisuttuarsinnaallutik. Taakkuli pinngortitamut angalaareerunik sumiiffinni allani soorlu Kapisilinni Qeqertarsuatsiaaniluunniit najugaqartunut attaveqarsimanatik Nuummut uteqqissapput.
Nuummiilli Danmarkimukartoqarsinnaatitsisoqassanersoq ataatsimiititaliarsuup misissorpaa.
Mittarfimmi immikkut mattusimatitsineq sivitsorneqartoq
Tunillaassortunik nappaalanersuaqarneranut ataatsimiititaliarsuup illoqarfimmit aallartoqarsinnaajunnaartitsinermi saniatigut mittarfimmi sanaartorfiup eqqaani covid-19-imik suli tunillaassuuttoqartutut oqartussat naliliinerat pissutigalugu immikkut mattusimatitsineq aamma sivitsorneqarpaa.
Immikkut mattusimatitsisoqarneratigut sanaartorneq tamarmi mattusimatinneqarpoq. Mittarfimmi sanaartornermik suliaqartut nioqqutissanik pisariaqartitaminnik pajunneqartassapput. Inuit nioqqutissanik pajuttut qanermut kiinnamulluunniit assiaquteqarnissaat piumasaqaataavoq, taakkulu allanut 2 meterinit ungasitsigisassallutik.
Tamatuma saniatigut immikkut mattusimatitsivimmiittut suli ikiorneqarsinnaallutillu coronamut misissortissinnaapput.
Apersortittoqarnerani kaffillernermi tunillatsittoq
Illoqarfiit pingaarnersaanni tallimat tunillatsissimasut nutaat ippassaq uppernarsarneqarmata timmisartukkut imaatigullu angallannerit unitsinneqaqqipput. Tamanna illoqarfimmi tuniluuttoqaqqilerneranik pissuteqarpoq.
Paasissutissat:
Peqqussuteqarnerup inerteqquteqarnerullu sivitsorneqarnissaat pillugu Tunillaassortunik Nappaalanersuaqarneranut Ataatsimiititaliarsuarmit peqqussut Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi, § 7, imm. 1 naapertorlugu Tunillaassortunik Nappaalanersuaqarneranut Ataatsimiititaliarsuarmit aalajangersarneqarput:
- Tunillaassortunik Nappaalanersuaqarneranut Ataatsimiititaliarsuup peqqussutaa nr. 2, 3. juni 2021-meersoq, ilaneqartoq Tunillaassortunik Nappaalanersuaqarneranut Ataatsimiititaliarsuup peqqussutaa 7. juni 2021-meersumik ulloq 2. juli 2021 ilanngullugu sivitsorneqarallarpoq.
Tusarfik: Tunillaassortunik Nappaalanersuaqarneranut Ataatsimiititaliarsuaq, ulloq 15. juni 2021
Tunillatsissimasunit nutaanit tallimanit pingasut arfininngormat apersortitsisoqarnerani kaffillernermi nereqatigiinnermilu tunillatsipput. Taamaammat inuit aaqqissuussinernut peqataasut 200-t tikillugit amerlassuseqartut ippassaq nalunaaqutaq 12.30-mit misissortikkiartornissamut neqeroorfigineqarput.
Taamaakkaluartorli pissutsit nakkutigineqarsinnaasut nakorsaaneq naliliivoq.
- Attaveqarfiit sumiinnersut ilisimavagut. Inuit 200-t missaannik amerlassuseqarsinnaanerat ilisimavarput. Kisianni ilisimavarput nalunagu tunillatsissimasut piffissami sivikitsuinnarmi tunillaasimasinnaasut. Taamaalilluta nakkutiginnissinnaanerput qularutiginngilarput, nakorsaaneq ippassaq oqarpoq.
Inuk ataaseq tunillatsissimasoq Ilulissaniippoq.
Nunatsinni tunillatsissimasutut paasineqarsimasut katillugit 49-pput. Maanna qulingiluat tunillatsissimasutut nalunaarsorsimapput. Taakkunannga ataaseq Dronning Ingridip Napparsimmavissuani peruluttut uninngavianniippoq, anersaartuuteqartinneqaranili.
Tunillatsissimasut sinneri angerlarsimapput.
