Nuuk International Film Festival: Kalaallit filmiliaat takuteqqaarneqalersut
Nuuk International Film Festival’eqaqqiliinnaqaaq, Nuummiorpassuit meeqqanut filmilianiit filminik amilaarnarluinnartulianut isiginnaariarsinnaapput, misilittagalinnik oqallitsitsinernik tusarnaariarsinnaallutik aamma filmi ammaassutaasussaq Twice Colonized takuniarsinnaallugu.
Festivalimi arfineq-aappassaa pisussami allattorsimaffik tamanut saqqummiuneqaqqammerpoq. Katuaq, Filmiliortarfik aamma Arctic Hub filminik septembarip 13-ianiit 16-ianut takutitsivigineqassapput.
- Kalaallit filmiliaannik ullut tamaasa takutitsisassaagut. NIFF-imut pisoq pingaartuuvoq. NIFF aamma tassaavoq, kalaallit filmiliortartut namminneq suliaminnik nunarsuatta sinnerani filmiliortartunut nittarsaassisarfiat.
- Tulluusimaarutigeqaarput festivaleqartitsisarnerput, nunatsinni filmiliortartut tapersersorlugillu filmiliaasa avammut takutittarnerat tatigisaassutigisaratsigu, festivalimi pisortaq Aviaq Brandt tusagassiorfinnut nalunaarummini allappoq.
Festivalip nalaani kalaallit filmiliaat sisamarsuit tamanut takuteqqaarneqassapput. Tassaapput:
Inoorusuppunga - Mads Petersen
Out of touch - Alexander Montgomery-Andersen
USULISSUAQ - David Heilmann Ottosen
ILISIITSUP ILLORSUA - Marc Fussing Rosbach
Ammaanermi takutitassaq pingaaruteqartoq
Filmi Nuummi filmfestivaqarnerani takutinneqartussaq siulleq tassaavoq Twice Colonized.
Aaju Peter, inatsisileritooq aamma inuit pisinnaaffiinik sorsuutiginnittoq, nunarsuaq tamakkerlugu nunat inuiisa pisinnaatitaaffeqarnerannik oqariartuuteqartartuuvoq.
- Kikkulluunniit Twice Colonized takusariaqarpaat, fillmi pingaaruteqarluinnarpoq, tassani qanimut takussagatsigu Aaju Peterp nunasiaataanerup kingunerisaanut akiuunnera aamma nammineq inuunermini aqqusaagaa alianartoq, ilitsersuisoq Pipaluk K. Jørgensen oqarpoq.
Katuaq aamma Arctic Hub filmimik takutitsiviussapput, Aaju Peterlu nammineq filmi piillugu apeqquteqartut akisassallugit najuutissaaq.
Twice Colonized nunanit pingasunit suleqataaffigineqarpoq - Danmark, Grønland og Canada.
Festivalimi pisussat allattorsimaffiat tamakkiisoq Katuap nittartagaani takusinnaavat. Filminut akileeqqaarluni takuniarneqarsinnaasunut bilitsisiffissaq aamma tassaniippoq.
