Nuuk Imermi suliunnaartussat ikiorniarneqalertut
Nuuk Imeq 2024-mi januaarip aallaqqaataani matuneqassasoq aalajangerneqartoq apriilip naanerani nalunaarutigineqarmat, nunatsinni suliffeqarfinni pisoqaanersat ilaata oqaluttuaannanngornissaa piviusunngortussanngorpoq.
Aatsaat taama ajuusaarnartigisumik misigisaqarluni, Nuuk Imerup siulersuisuisa siulittaasuat Kuupik Kleist tamatumunnga atatillugu oqarpoq.
Nuuk Imeq matussasoq nalunaarutigineqarmat, tassani ukiortaami suliunnaartussat 50-it missaanniittut naapertuilluartumik ukkatarineqalertorput.
Taakkuli ikiorniarneqarlerunarput.
Nuuk Imermi matuppat, tassani suliunnaartussanik mittarfissuartaassami sulilersussanik atorfinitsitsisinnaanerlutik Mittarfeqarfiillu misissoritsik, Kalaallit Airports tusagassiutinut ullumi tallimanngornermi nalunaarpoq.
Ilimaginngisamik suleqatigiittut
Tassa Nuuk Imermi suliunnaartussanik atorfinitsitsinissaq periarfissaanersoq paasiniarlugu Kalaallit Airportsimi Mittarfeqarfinnilu qullersat Nuuk Imermilu suliunnaartussat sapaatit akunnerini tulliuttuni ataatsimeeqatigiittaassapput.
Nuuk Imermi sulisut teknikkilerinermik assartugalerinermilu ataqatigiissaarinermik sungiussisimalluartuummata mittarfissuartaassami sulilernissamut piukkunnartut, Kalaallit Airportsip pisortaanera Jens Lauridsen oqarpoq.
Nuuk Imermi suliunnaartussat sulerisuusinnaassangatippisigit?
- Soorlu niuertarfinni sulisutut, assartugalerisutut nakkutilliisutulluunniit suliaqartuusinnaapput. Aamma angisuunik maskiinalerisuusinnaapput, Kalaallit Airportsip pisortaanera Jens Lauridsen KNR-imut oqarpoq.
Nuuk Imermi suliunnaartussanit qasserpiaat atorfinitsinneqarsinnaanersut suli ilisimanagu suliunnaartussallu tamarmik sulilersinnaanissaat neriorsuutigisinnaanagu, taanna oqarpoq. Taakkunanngali amerlasuut sulilersinnaassasut ilimagigitsik, taanna aamma oqarpoq.
Nuummi mittarfissuassami ingerlatsinermi sulisussanik 50-60-it missaannik pisariaqartitsillutik, Jens Lauridsen oqarpoq.
Taakku suliffeqarfimmi Kalaallit Nunaata siunissaanut pingaaruteqaqisumi pissanganartumilu sulilernissaat neqeroorutigisinnaagitsik tamannalu Nuuk Imermi sulisut ilarpassuisa soqutigissagaat neriuutigigini, taanna aamma oqarpoq.
Mittarfissuassaq 2024-p naanerani atoqqaartinneqartinnagu sulilertussat isumannaallisaanermi akuerineqassasut, pikkorissaanerni arlalinni peqataassasut suliassanillu naammassinneqataasassasut, Kalaallit Airports erseqqissaavoq.
Atsiorluni isumaqatigiissusiornerit siulliit Kalaallit Airportsip sapaatit akunneri tulliuttut marluk pingasulluunniit ingerlaneranni pissangatikkai, Jens Lauridsen oqarpoq.
