Nuuk ajugaavoq
Kuupik Kleist aamma Savalimmiuni naalakkersuisut siulittaasuat Kaj Leo Holm Johannesen ataasinngormat illersornissamut ministeri Gitte Lillelund Bech ataatsimeeqatigaat, tassanilu isumaqatigiissuteqarput. Sisamanngornermilu illersornissaq pillugu isumaqatigiissummi Folketing-imi tapersersuisut aamma taamatut aalajangerneq akueraat.
Issittumi sakkutooqarfik qallunaatut taaguuteqalissaaq værnfælles Arktisk Kommando taannalu Tòrshavn-imi immikkoortoqarfeqalissaaq. Nuummiittussanngorneranut aalajangernermut tunngaviusut arlaqarput. Ilaatigut tunngavilersuutigineqarpoq Naalakkersuisut qanimut suleqatigineqarnissaat, Nunatsinni politimesterimik suleqateqarnissaq aammalu Savalimmiuni oqartussat suleqatiginissaat. Sakkutuut najugaqarfissaannik sanasoqassanngilaq – Issittumi sakkutooqarfiup pingaarnertut suliarissavaa Atlantikup avannaani issittumi suliat ataqatigiissarnissaat.
- Sakkutuut Atlantikup avannaani issittumilu arlalinnik suliaqareerput ataqatigiissaarneqarnerallu pitsaanerusumik ingerlanneqalerpat nukiit pitsaanerusumik sulianut atorneqarsinnaalissapput, illersornissamut ministeri Gitte Lillelund Bech nalunaarpoq.
Piffissami aggersumi Kalaallit Nunaat, Danmark Savalimmiullu immikkuualuttut pillugit isumaqatigiinniassapput, tassanilu ilaatigut isummerfigineqassapput Kangilinnguani aamma Savalimmiuni Mjørkedal-imi sakkutooqarfiit. Sakkutooqarneq pillugu 2012-2014-mut isumaqatigiissummi allassimavoq issittumi suliat misissoqqissaarneqassasut. Suli maannamut ilisimaneqanngilaq Issittumi sakkutooqarfik qaqugu atulissanersoq.
Naalakkersuisut siulittaasuata Kuupik Kleistip piffissami sivitsulersumi eqqartortarpaa Nuuk inissiiffissatut piukkunnarnerusoq, tassanili ilaatigut parteeqatiminit illuatungilerneqarpoq soorluttaaq Siumup Narsarsuaq inissiiffissatut tikkuarsimagaluaraa.
