USA-mi eqqartuussiviit qullersaata naartuersissinnaanerup inerteqqutaalersinneqarnissaa aalajangeraa
USA-mi arnat ukiuni 50-ini kingullerni naartuersissinnaariarlutik tamanna maanna inerteqqutaaleratarsinnaavoq.
Naartuersissinnaaneq periarfissaassanersoq, USA-mi naalagaaffiit ataasiakkaat namminneq aalajangersinnaassagaat, USA-mi eqqartuussiviit qullersaata taasinermi siullermi aalajangerpaa.
Nutaarsiassaqartitsivik Politico, allakkat nutaarsiassaqartitsivimmut ingerlateqqinneqarsimasut aallaavigalugit taama allappoq.
AAMMA ATUARUK Eqqartuussissuserisup naartuersittarnermut inatsit oqallisigineqangaatsiartoq unitsikkallaraa
Naartuersissinnaanerup inatsisitigut USA-mi inerteqqutaalersinneqarnissaanut suli aalajangivittoqanngilaq, eqqartuussisummi isummatik allanngortissinnaavaat, Politicolli allaaserisaa naapertorlugu qaammatit marluk tulliuttut ingerlaneranni aalajangivittoqarumaarpoq.
Massakkulli aalajangiineq attatiinnarneqassappat, arnat USA-mi pisinnaatitaaffii pillugit allannguisoqarujussuassaaq.
Naartuersissinnaanerup pisinnaatitaaffiunissaa eqqartuussiviit qullersaata 1970-ikkut aallartisimalaarneranni aalajangerpaa, taannali maanna allanngortinneqalerunarluni.
AAMMA ATUARUK USA-mi eqqartuussiviit qullersaata Louisianami naartuersittarnermut inatsit atortussaajunnaarsikkaa
USA-mi eqqartuussiviit qullersaat qulingiluanik eqqartuussisoqarpoq. Taakkunannga arfinillit republikanerit sinnerlugit præsidentinit toqqarneqarsimapput, pingasullu demokratit sinnerlugit præsidentinit toqqarneqarsimallutik.
Eqqartuussisut republikanerinit toqqarneqarsimasut akornanni tallimat naartuersissinnaanermut inatsit allanngortinniarlugu taasiniarput, taamaalillutillu amerlanerussuteqassallutik.
USA-mi naalagaaffiit arlallit naartuersissinnaanermut inatsisit ukiuni kingullerni sukateriffigisimavaat.