Eqqartuussissuserisup naartuersittarnermut inatsit oqallisigineqangaatsiartoq unitsikkallaraa

Naartuersissinnaanerup killilersorneqarnissaanut Texasimi inatsisip nutaap atuutilersinneqarnissaa Texasimi eqqartuussisut ilaannit unitsikkallarneqarpoq.

USA-mi naalagaaffiup Texasimi inatsit nutaaq pillugu siusinnerusukkut eqqartuussivilersuuppaa, inatsit tunngaviusumik inatsimmut naapertuunnersoq eqqartuussivimmit misissorneqartusssanngorlugu.

Naartuersissinnaaneq pillugu inatsit Texasimi septembarimi atuutilerpoq, oqallisaasorujussuullunilu.

Texasimi arnat sapaatit-akunneri arfinillit sinnerlugit naartoreersut naartuersinnissamut ikiorneqarpata inuit ikiuisut inatsisitigut malersorneqarsinnaalerput.

Arnat pinngitsaalineqarlutik naartulersimasut, qanigilluinnakkamilluunniit atoqateqarnermi naartulersimasut aamma naartuersissinnaajunnaarsinneqarput.