Nutaarsiassaqartitsivik inuit attaveqaqatigiittarfiitigut nukittorsarpoq

Tusagassiuutit silarsuaat sukkasuumik allanngoriartorpoq, taamaattumillu KNR-imi atuisut sumiiffiini nutaarsiassanillu piffissami eqqortumi siammarterinissaq qulakkeerniarlugu, nutaarsiassaqartitsivik inunnut attaveqatigiittarfilerisussanik tusagassiortunik marlunnik atorfinitsitsivoq.

- Nutaarsiassat innuttaasunut suli tikikkuminarnerulersikkumallugit tusagassiortutut inunnut attaveqatigiittarfilerisut marluk, tassaasut Sikkersoq Rosing Karlsen aamma Cecilie France Jarsmer atorfinitsippagut, KNR-ip nutaarsiassaqartitsiviani pisortaq Irene Jeppson oqarpoq.

Siunissami tusagassioriaaseq

inunnut attaveqatigiittarfilerisunik tusagassiortunik atorfinitsisisoqarneratigut KNR-ip nutaarsiassaqartitsiviata nunarsuarmi pissutsit malinnaaffigai, digitalikkummi tusagassiuutit nutaarsiassalerinermi ilaalersimapput.

- Amerlasuut – pingaartumik inuusuttut – nutaarsiassat inuit attaveqatigiittarfiitigut naammattoortarpaat. Ilaannaasa tv, radiu aviisilluunniit malinnaaffigisarpaat. Amerlasuulli inuit attaveqatigiittarfii atugarivaat, taamaattumik siunissami tusagassiornermut iluaqutaalluassasoq KNR-imiit isigaarput, Irene Jeppson oqarpoq.

KNR-ip nutaarsiassaqartitsiviata taama iliuuseqarnera nutaajuvoq, tassanilu tusagassiorneq inuillu attaveqatigiittarfii qaninnerulersinneqarput. Tassuuna atuisunut tutsuiginartumik tunniusimasumillu nutaarsiassanik toqqaannartumik siammarterinerup sukkanerulernissaa qulakkeerneqassaaq.

Inunnut attaveqatigiittarfilerisut Instagramikkut tassa knr.gl-ikkut malinnaaffigisinnaavatit.