Sivisujaamik oqaloqatigiinnerit pereersut KNR, Koda aamma Tusass Music Koda Awardsimut kalaallit nipilersortartuisa nalliuttorsiutigineqarnerannut atatillugu suleqatigiinnissamik isumaqatigiissuteqarput.

Suleqatigiinnissamik isumaqatigiinnerup kinguneranik ilaatigut KNR nersornaammik tunniussinissaa isumaqatigiissutigineqarpoq. Tassami ukiuni kingullerni tallimani nipilersortartut videoliaasa aalajangersimasut akornanni KNR-ip isiginnaartartuinit nuannarineqarnerpaaq KNR-imit nersornaaserneqassaaq.

Isiginnaartartut videoliaq KNR-imit nersornaasertikkusutartik SMS-ikkut toqqarsinnaassavaat. Atuisut quleriaq taasisinnaassapput; videoliarlu taagorneqarnerpaaq nersornaaserneqarumaarluni.

Koda Awards Katuami januaarip 18-anni nalunaaqutaq 20.00 pissaaq KNR-TV-kkullu toqqaannartumik aallakaatinneqassalluni.

Koda Ukiumut Nersornaat aamma Ataqqinaammik Nersornaat tunniutissavai, Tusass Music-illu Tusass Music Award tunniustissallugu.