Nutaarsiassaqartitsivik: FN-ip nunat tamalaat inuussutissaqarnissaannik pilersaarusiortuisa Afrikap kujasissuani allattoqarfitsik matuaat

Naalagaaffiit Peqatigiit nunat tamalaat inuussutissaqarnissaannik pilersaarusiortuisa, WFP-p, Afrikap kujasissuani allattoqarfitsik matuaat.

Nutaarsiassaqartitsivik Bloomberg nutaarsiassaqartitsivik Reuters aallaavigalugu taama allaaserisaqarpoq.

Taama aalajangertoqarnera WFP-p nunani tamalaani aqutsisuata WFP-p nunani tamalaani sulisuinut emailikkut sapaatit akunnerata siuliani tallimanngornermi tamanna nalunaarutigaa.

- WFP-p Afrikap kujasissuani nunarsuup immikkoortuani Johannesburgip allattoqarfini matussagaa ajoraluartumik aalajangerparput, Bloomberg email aallaavigalugu allappoq.

USA-p ikiorsiisarnermi aningaasaliissutaasa ikilisarneqarnissaannut USA-p præsidentiata Donald Trumpip qanittukkut aalajangerneranit tamanna allaaveqarnersoq itinerusumik oqaatigineqanngilaq.

USA-p nunani tamalaani ikiorsiisarnermut aqutsisoqarfiata USAID-ip aningaasaliiffigineqartarnerata ulluni 90-ini unitsinneqarnissaanut naalakkiut, Donald Trumpip præsidentitut ivertinneqarsimatsiarnermi kingorna atsiorpaa.

Nunani tamalaani ikiorsiissutigineqartartut nunanut allanut tunngasuni nammineq politikkimut naapertuunnersut misissorneqassasoq Trumpip ilaatigut oqaatigaa.

USA-p nunani tamalaani ikiorsiisarnerisa 92 procentii sipaarniarfigineqassasut, USA-p nunanut allanut tunngasuni ministereqarfiata sapaatit akunnerata siuliani nalunaarutigaa. Tassa 54 milliardit dollarit, imaluunniit 384,6 milliardit koruunit missaat pineqarput.

Afrikap kujasissuani ukiuni kingullerni aatsaat taama panernersuaqartigivoq, tamannalu suli malugineqarluni.