Erik Jensen Kangerlussuup umiarsualivia pillugu: Nutaamik umiarsualiviliornissaq ilimanarpallaanngilaq

Kangerlussuup umiarsualivia siorartaajarneqarnani ukiaru assanneqassasoq, ineqarnermut attaveqaasersuutinullu naalakkersuisoq Erik Jensen (S) ilisimatitsivoq.

Allattoq Helle Nørrelund Sørensen

aggustip 29-at 2023 10:12

Nutserisoq Hanne Petersen

Kangerlussuup takornarianut inuinullu atoruminartumik nutaamik anginermillu ukiuni tulliuttuni umiarsualivittaarnissaa ilimanarpallaanngilaq.

Ineqarnermut attaveqaasersuutinullu naalakkersuisoq, Erik Jensen (S), KNR-imut akissummini allappoq.

Aamma atuaruk Takornarialerisut suaarutigeqqikkaat: Kangerlussuup umiarsualivia pitsanngorsarneqarli

Umiarsualiviliornissanut talittarfiliornissanullu 25,2 millionit koruuninik ukiut tamaasa 2027-p tungaanut immikkoortitsisarnissaq, Naalakkersuisut 2024-mi aningaasanut inatsisissatut siunnersuutigaat. Aningaasalli taakku Kangerlussuarmi umiarsualiviliornissamut aamma atussanersut, siunnersuutaanni allaqqanngilaq.

- Aningaasanik taama amerlatigisunik ujartuinissaq Inatsisartut suliassaraat, Erik Jensen KNR-imut allappoq.

Kangerlussuarmili nutaamik umiarsualiviliorneq qanoq akeqassanersoq, Naalakkersuisulluunniit tamatumunnga aningaasaliinissaq salliutinneraat, taassuma ilisimatitsissutiginngilaa.

Sioqqertarnera ajornartorsiutaasoq

Kangerlussuup umiarsualiviata pitsanngorsarneqarnissaa takornarialerisut akornanni ukiorpassuarni kissaataavoq.

Takornariartaassuimmi Kangerlussuup umiarsualivianut aqqusaartartut amerliartuinnarput. Tamatumali eqqaa meterialuinnarnik itissuseqarmat, takornariartaassuarni ilaasut inuttallu umiatsiaaqqanik ikaassorneqartariaqartarput.

KANGERLUSSUUP UMIARSUALIVIA NAATSUMIK

Namminersorlutik Oqartussat Kangerlussuup umiarsualivianik piginnittuupput. Mittarfeqarfiit tamaani umiarsualivimmik isumaginninnermik ukiaq akisussaasuujunnaarmata, Sikuki Nuuk Harbour A/S akisussaasuulerpoq.

Kangerlussuup umiarsualiviani eqqaanilu silap allanngorarujussuarnerata kingunerisaanik siornatigorninngarniit kinneqarneruleriartornissaa ilimanartoq, Namminersorlutik Oqartussat nunatsinni umiarsualivinnut immikkoortumut 2017-imiit 2027-mut pilersaarutaanni allaqqavoq.

Kangerlussuup umiarsualivia nioqqutissanik tikiussanik usingiarfissaqqinngitsoq takornariartaassuarnilu ilaasunik ikaassuiffissaqqinngitsoq, Nuummili Ilulissanilu mittarfissuassat ammareerpata naleqqunnerulisssoq, pilersaarummi aamma allaqqavoq:

- Ilulissat aamma/imaluunniit Nuuk nunatsinnut nunniffiusalerpata ilaasunik Kangerlussuarmi paarlaatsitsinissamik pisariaqartitsineq millissaaq, umiarsualivillu taamaalippat tassunga naleqqussartariaqassalluni.

60 millionit koruunit Qaanaami, Uummannami Kangerlussuarmilu umiarsualiviliornissanut 2017-imi aningaasanut inatsimmit immikkoortinneqarput. Aningaasalli taakku Qaanaamiinnaq Uummannamiinnarlu umiarsualiviliornernut naammassimapput.

Allisiguk

Kangerlussuullu umiarsualivia sioqqertaqimmat ukiualuit allorlugit siorartaajarneqartariaqartarpoq. Ukiunili kingullerni siorartaajarneqarnikuunngimmat ukioq manna siornatigorninngarnit angallavigiuminaanneruvoq.

Taamaammat takornariartaassuit ilaasuminnik, inuttaminnik usiminnillu ikaassueriaannaajuaannanngitsut, angalatitsivileqatigiiffiup Albatros Arctic Circlep pisortaa Jørgen Hansen KNR-imut oqarpoq.

Ikaassuinissamimmi ullup unnuallu ingerlaneranni akunnerni katillutik sisamat missaanni periarfissaqartanngillat.

- Tamanna takornariartaassuarnut kipiluttunarpoq, taakkumi pilersaarusiornerminni timmisartuussinissanut piffissaliussat maleqqissaartariaqartarpaat, Jørgen Hansen oqarpoq.

Kangerlussuup umiarsualiviata atoruminarsarlugu pitsanngorsaanissamik pilersaarusiorluaqqissaartariaqartoq, inuussutissarsiortut kattuffiata Arctic Circle Businessip pisortaa Jesper Schrøder aamma isumaqarpoq.

- Siumungaaq isigaluta pilersaarusiortariaqarparput: Nutaamik Kangerlussuarmi allami umiarsualiviliortoqassanersoq umiarsualivioreersorluunniit assersuutigalugu ukiut marluk allortarlugit siorartaajarneqartassanersoq aalajangerneqartariaqarpoq.

Ukiaru assanneqassasoq

Namminersorlutik Oqartussat Kangerlussuup umiarsualivianik piginnittuupput. Sikuki Nuuk Harbour A/S-ili Miitarfeqarfiit paarlallugit Kangerlussuup umiarsualiviani siorartaajaanermik upernaaq isumaginnittuulerpoq.

Sikuki sanaartugassiissutinik suliaqartartunik naleqquttunik atortulinnik inuttalinnillu takornarialerisut ukioq manna ulapaarunnaartinnagit siorartaajaasussarsiorami isumaginnittussarsinngitsoorsimasoq, Erik Jensen ilisimatitsivoq.

Taamaammat Kangerlussuup umiarsualivia siorartaajarnagu assanneqassasoq Naalakkersuisut aalajangertut, taanna KNR-imut allappoq.

- Taamaaliornikkut angallatit aqqutaat ukiuni arlalinni akornuteqanngitsumik aqqutigineqarsinnaalissaaq, tassuunakkullu ujartorneqartutut Kangerlussuup umiarsualivianut aqqutissat toqqissisimanarnerulerlutillu patajaannerulissapput. Naalakkersuisut assaaneq 2023-mi ukiakkut aallartinneqassasoq anguniarpaat.

60 millionit koruunit Qaanaami, Uummannami Kangerlussuarmilu umiarsualiviliornissanut 2017-imi aningaasanut inatsimmit immikkoortinneqarput, aningaasalli taakku Qaanaamiinnaq Uummannamiinnarlu umiarsualiviliornernut naammassimapput.

Inuussutissarsiortut kattuffiata Arctic Circle Businessip pisortaa, Jesper Schrøder, Erik Jensenip tamatumani nalunaarutaa pillugu oqaloqatiginiarsimagaluarparput, oqaluttuamilli uuminnga saqqummiitinnata pisinnaasimanani.

Nutaarsiassami kukkunermik nassaarsimaguit uunga allaffigineqarsinnaavugut.