Takornarialerisut suaarutigeqqikkaat: Kangerlussuup umiarsualivia pitsanngorsarneqarli

Kangerlussuup mittarfia inunnik ujameriappoq. 

Tamanna tusarnartaanngilaq, takornariartaassuilli Air Greenlandillu timmisartorsuartaava Tuukkaq tulleriiginnarlutik tamaanga tikimmata pisarnermiit inoqarneroqaaq.

Kangerlussuulli pisarnermiit inoqarnerunera timmisartuussinissanik kinguartitsinernik taamaatitsinerninilluunniit peqquteqarnani, umiarsualiviata ukiuni kingullerni siorartaajarneqarsimannginneranik peqquteqarpoq.

Kangerlussuummi umiarsualivia sermersuup aakkiartornerata kingunerisaanik sioqqersimaqaaq. Tassa takornariartaassuit ilaasuminnik, inuttaminnik usiminnillu umiatsianik ikaasssueriaannaajuaannaanngillat. Ikaassuinissamimmi ullup unnuallu ingerlaneranni akunnerni katillutik sisamat missaanni periarfissaqartanngillat.

Angalatitsivileqatigiiffiup Albatros Arctic Circlep pisortaa, Jørgen Hansen, taama oqarpoq.

- Ullup unnuallu ingerlaneranni marloriarluni akunnerit marluk missaanni tininnganerani taamaalioriaannaasoqartanngilaq. Tamannalu takornariartaassuarnut kipiluttunarpoq, taakkumi pilersaarusiornerminni timmisartuussinissanut piffissaliussat maleqqissaartariaqartarpaat, taanna nassuiaavoq.

Takornariat 20.000-t

Albatros Arctic Circle Kangerlussualiarlutik Kangerlussuarmiilluunniit aallarlutik takornariartaassuarni katillutik 50-it missaanniittuni ilaasunik 20.000-t missaannittuusunik angalatitsisuuvoq. 

Takornariartaassuarnili umiarsualiviup sioqqersimangaatsiarnerani aqqullunnera peqqutaalluni tikinnginngitsuuinnartoq maannamut ataasiuvoq.

Tassa takornariartaassuit piffissap ilaani ikaassueriaannaasannginnertik pissutigalugu ilaasutik allamut angalaartilaarnissaannut piffissaalatsilersarput.

- Neqeroorutitta ilarpaalui taamaatiinnartariaqartarpavut. Siornatigutulli angalaartitsilaarsinnaatiginngilagut. Tamanna isertitaqarluarniarnitsinnut tunngatillugu erloqinalaarpoq, Jørgen Larsen oqarpoq.

Aningaasaliissutaasut allani umiarsualiviornernut atortut

Namminersorlutik Oqartussat Kangerlussuup umiarsualivianik piginnittuupput, Mittarfeqarfiillu Kangerlussuup umiarsualiviani ukiut pingasut sisamalluuniit allortarlugit siorartaajaanermik ukioq manna tikillugu isumaginnittuuvoq.

Sikuki Nuuk Harbour A/S-ili Kangerlussuup umiarsualivianik upernaaq isumaginnittuulerpoq. Sikukilu tamaani aatsaat septembarip naanerani siorartaajaasinnaavoq. Tamatumunngalu atatillugu suliariumannittussarsiuleruttorlutik, Sikuki nittartakkamini allappoq.

Nunattali politikerii Kangerlussuup umiarsualiviata takornarianut tamaanimiunullu atoruminarsarlugu pitsanngorsarneqarnissaanik qularnaarisariaqartut, angalatitsivileqatigiiffik Albatros Arctic Circlelu isumaqarpugut. Arctic Circle Businessip pisortaa, Jesper Schrøder, KNR-imut taama oqarpoq.

- Siumungaaq isigaluta pilersaarusiortariaqarparput: Nutaamik allami umiarsualiviliortoqassanersoq umiarsualivioreersorluunniit assersuutigalugu ukiut marluk allortarlugit siorartaajarneqartassanersoq aalajangerneqartariaqarpoq, taanna oqarpoq.

Allamili umiarsualiviliornissaq aatsaat oqallisaalinngilaq.

60 millionit koruunimmi Qaanaami, Uummannami Kangerlussuarmilu umiarsualiviliornissanut 2017-imi aningaasanut inatsimmit immikkoortinneqarput. Aningaasalli taakku Qaanaamiinnaq Uummannamiinnarlu umiarsualiviliornernut naammassimapput.

Umiarsualiviliornissanut talittarfiliornissanullu 25,2 millionit koruuninik ukiut tamaasa 2027-p tungaanut immikkoortitsisarnissaq, Naalakkersuisut 2024-mi aningaasanut inatsisissatut siunnersuutigaat. Aningaasalli taakku Kangerlussuarmi umiarsualiviliornissamut aamma atussanersut, siunnersuutaanni allaqqanngilaq.

Inuussutissarsiortut kattuffiat: Nunatsinni takornariaqarneq tamanut iluaqutaassaaq

Ilulissani Nuummilu mittarfissuartaassat 2024-mi atoriaannnaalissasut ilimagineqarpoq.

Namminersorlutik Oqartussalli Kangerlussuarmi nutaamik umiarsualiviliortitsinissamut aningaasaliinissaannnut suli tunngavissaqarluartoq, Arctic Circle Business Jesper Schrøder isumaqarpoq.

- Nunatsinni takornariaqarnermi inerisaanerup nunatsinni tamanut iluaqutaassasoq eqqaamasariaqarpoq. Takornariaqarnerlu sumi aningaasarsiorfiulluarnersoq sumilu aningaasarsiorfiulluarsinnaanersoq misissortariaqarparput, taanna oqarpoq.

Takornariaqarnerlu Kangerlussuarmi Sisimiunilu attanneqarsinnaasumik inerisarneqartoq, taanna aamma oqarpoq.

- Sermersuarmi ukiumut 25.000-nit ikinnerunngitsunik, nunatsinni pinngortitamut inuinullu akornutaangaanngitsumik, takornariaqartarpoq, taanna oqarpoq.

Kangerlussuup umiarsualivia pitsanngorsarneqanngippat, takornariartaassuit kinguaattoorlutik tikittut tikissaartulluunniit amerlissasut, taanna isumaqarpoq.

- Tassa nunatsinni umiarsualiviit ilaannut tikissaarsinnaapput, tamannalu takornariartaassuarnut unamminartuussaqaaq, Jesper Schrøder KNR-imut oqarpoq.

Ineqarnermut Attaveqaasersuutinullu Naalakkersuisoq Erik Jensen (S) oqaloqatiginiarsimagaluarparput, oqaluttuamilli uuminnga saqqummiitinnata pisinnaasimanani.