Nutaamik isumaqatigiissuteqalerput: Amerikamiut sakkutuui Danmarkiliangajalersinnaapput

Danmarkip aamma USAp illersornermik suleqatigiinnermut nutaamik isumaqatigiinniarneq aallartippaat. Sisamanngormat tusagassiortunik ataatsimiisitsinermi ministeriuneq Mette Frederiksen (S) oqarpoq.

Kingunerisinnaavaa siunissami amerikamiut sakkutuui Danmarkimi naammattuugassaasinnaassasut. Sukumiinerusumik immikkuualuttortai isumaqatigiissutiginiarneqassapput.

- Nuannaarutigaarput USAp Danmark illugiilluni  illersornissamut isumaqatigiissummik isaasssivigimmagu, Mette Frederiksen oqarpoq.

- Qanorpiaq isikkoqassanersoq suli naammassinngilaq, kisianni amerikamiut sakkutuui, sakkutuullu atortui danskit nunataanni ilanngunneqassapput, oqarpoq.

Kalaallit Nunaanni Savalimmiunilu sakkutuut amerlissanngillat

Isumaqatigiissutissami Kalaallit Nunaat Savalimmiullu ilanngunneqanngillat, ministeriuneq oqarpoq.  

Illersornissamut ministeri Morten Bødskov (S) naapertorlugu isumaqatigiissut Danmarkiinnarmut tunngasuussaaq amerikamiullu Europamut anngussinnaanissaat oqilisaallugu. 

- Isumaqatigiissutikkut suleqatigiinnerunissaq Danmarkimilu sumiiffinni assigiinngitsuni toqqakkani sakkutuutut iliuuseqarnerit amerlanerit  ammaanneqassapput. Arlalippassuartigut USA-mik suleqateqarnerput nakussassassavaa.   

Kisianni aallaavittut Danmarkimi amerikamiut sakkutooqarfeqassanngillat, kisianni Illersornissaqarfiup massakkut oqartussaaffiini qaninnerusumik suleqatigiinneqassaaq.

AAMMA ATUARUK Biden vil inden længe sende soldater til Østeuropa

- Assersuutigineqarsinnaavoq sungiusarnerit assigiinngitsut. Immakkut, silaannakkut suleqatigiinnerup nakussassarnissaa assersuutigalugit taaneqarsinnaapput. Kisianni Danmarkimi amerikamiut sakkutooqqarfeqarnissaat aallaaviunngilaq Morten Bødskov oqarpoq.

Mette Frederiksenip oqaatigaa isumaqatigiissummut Kalaallit Nunaat Savalimmiullu ilanngikkaluartut taakkunani naalkkersuisut ilisimatinneqartut.  

- Isumaqatigiissut Danmarkimut tunngasuuvoq. Soorunami suliaq una pillugu Kalaallit Nunaat Savalimmiullu qanimut attaveqarfigaavut soorlu aamma illersornissamut sillimanissamullu suliani taamaattartugut, aammalu tamatuma uppernarsarpaa qanoq pingaaruteqartigisoq attaveqarnissamut ataatsimiititaliaqaleratta naalagaaffeqatigiinnermilu ilaasunut sinnerinut  suleqatigiinneq nakussassarlugu.  

Suleqatigiinneq Ruslandip Ukrainillu akornanni najummassimanartorsiornermut massakkorpiaq ingerlasumut attuumassuteqanngilaq, ministeriuneq aalajangersaavoq – kisianni isumaqatigiinniarnerit soqutiginarnerulersiinnarpaat. Danmarkip aamma USAp akornanni isumaqatigiinniarnerit qaammatit tulliuttut ingerlaneranni aallartinneqassapput.  

Danskit naalakkersuisuisa ilisimatitsissutigaat isumaqatigiissummi danskit tunngaviusumik inatsisaat malinneqassasut. Kisianni siumungaaq qularnaateqanngilaq Danmarkip USA akuerissanngikkaa sakkunik atomitortunik nunamut eqqussinissaannut, Morten Bødskov ilisimatitsivoq.