Nunavut inuuniapiloornermit suli sunnersimaneqartoq

Ataatsimiinnermi Nunavut 15-imik taaneqarsimasumi inuit Nunavuup pilersinneqarnerani sunniuteqaqataasimasut peqataapput.

Inuit Tapiriit Kanatami præsidentiata Terry Audlap Nunavumi inuit ukiut 15-it matuma siornarnit pitsaanermik inuuneqarnersut akiniarsaraa. Saqqummiussaalu isumalluarsaarinngillat.

Aamma atuaruk Nunavummi naggueqativut inuussutissat akisuallaarneri pillugit akerliussutsimik takutitsisut

Nunavummiut agguaqatigiissillugit Canadamiunit allanit ukiunik qulinik inuunikinnerusarput, meeqqallu toqusarnerat suli annertuvoq. Nunavummiut imminut toquttartut Canadap sinneranut naleqqiullugit aqqanileriaammik amerlanerupput, nappaatillu tunillaattartut, ilaatigut tuberkulose, atugaavallaarujussuarlutik, Terry Audla oqarpoq.

Kisitsisit nuanninngitsut tamakkut najugaqarnermut attuumassuteqartut Terry Audlap oqaatigaa, najukkammi pitsaanatillu peqqinnanngimmata.

Aamma atuaruk Leona Aglukkaq: Naalakkersuisut Nunavummi inuussutissanut tapiissuteqartarput

Nunavumi illut pingajorarterutaasa missaat inoqarpallaarput, tassa sinittarfinni inuit arlallit sinittarput. Illuni mikisuni inuit 15-18-it missaat ilaannikkut najugaqarsinnaasarput.

Tamanna peqqinnanngilaq. Amerlasuutigullu angerlarsimaffimmi persuttaanermik tarnikkullu ajornartorsiornermik kinguneqarsinnaasarpoq inuusuttullu peqqissumik peroriartunnginnerannik, ilinniarnerannulluunniit ajoqutaasinnaalluni. Najugassaqarniarnerup ajornartorsiutaanera kingunipiloqartorujussuuvoq, Terry Audla nassuiaavoq.

KNR-imit apersorneqarnermini Terry Audlap oqaatigaa Nunatsinni pitsaasorpassuarnik takusimalluni Nunavummiullu, ingammik inuusuttut, Nunatsinnit ilikkagaqarluarsinnaasut.