Nunatta kujataani tunumilu inuit alutorsaateqartut

Nunatta kujataani nannut alutorsaatigineqarlutillu ersissutigineqareersullu uumasut ajortumik eqqarsaateqanngitsut navianaateqanngitsullu ukkatarineqalerput.

Nanortalimmimi Tasiilamilu qussuit qaqutigoortut alutorsaatigineqarput.

Timmiaq Danmarkimi nalinginnaasuuvoq, taannalu aallartartuunngikkaluarpoq, taamaammat nunatsinni takuneqarnerat tupinnalaarpoq.

Kristine Kleist Lundblad Nanortalimmeersoq takunnittut ilagaat. Naallu nunatsinni aatsaat siullermeertumik qussoqanngikkaluartoq msiigisaq angeqaaq.

-Alutornaqaat, nuanneqaat.  Kusanarnermik anginermillu, taavalu tumaat aamma takusarlugit, taava pisuttuaraangatta nunamiittarput ilaat, qanillivittarparput, taava kisiat immamukartarput, taanna oqarpoq

Aallaqqaammut qussuit marluk Nanortalimmi assilisaqattaarneqareersut, uku amerlanerit Kristine Kleist Lundbladip assilisinnaasimavai.

- Katillugit uanga 12-it naammattoorpakka, aajuku pingasut suli saqqumipput, taanna oqarpoq, aatsaallu taama amerlatigisumik takulluni oqaatigaa.

Qussuit amerlasuut ataatsimoortut nunatta kujataani takuneqarput. Assi © : Privat

Sangsvane Islandimeersoq

Qussuit Nanortalimmi kisimi alutorsaatigineqanngillat. Jens Høy Tasiilami ukiut 50-it sinnerlugit najugaqartoq qussunnik takusut ilagaat.

Tamatumalu saniatigut aatsaavissuaq qussummik Tasiilami takunerarpoq.

- Aatsaavissuaq maani ippassaq takkornaqqaarpunga. Alutornarpoq assut.

Qussunnullu – kujataani takuneqartunut sanilliullugit taakku ataatsimoortuunngillat.

- Ataaseq maaniittoq kisimiipoq, tallimaasimagaluarput amerlanerusimanngikkunik, taakku sisamat takuneqartut avannamut ingerlaarput, taanna oqarpoq.

Pinngortitaleriffimmit biologip Aili Labansenip oqarnera naapertorlugu qussuit ullualuit suli maaniissagunarput. Assi © : Henrik Hansen

Pinngortitaleriffimmi biologip Aila Labansenip nunatta kujataani tunumilu siumorneqartut danskisut sangsvane-nik taaneqartartuunerarpai.

Taakkua Islandimi piaqqiortarlutillu ukiisarput aasalerneranilu nunatta kujataanukariarlutik ukiakkut Islandimut uteqqittarsimassasut taassuma nassuiaatigaa.

Qussuit Nanortalimmiittut ulluni tulliuttuni aamma alutorsaatigineqassangunartut, Aili Labansenip oqaatigaa.

Kristine Kleist Lundbladip timmissat kusanartut aasaanerani takusarsinnaassagamikkit nuannaarutigaa, tikittualernissaallu neriuutigalugu:

- Immaqa akuttunermik, ukiukkut peqarneq ajorami, aasalernerani takkuttaramik aatsaat, ukioq naallugu soqarneq ajoratta taava takkukkaaangata kusanartarnermik nuannertarnermik.

Kujataani kangerlunni Narsamilu qussuit aamma naammattoorneqallattaasimapput.