Nunatta iluanaarnissani kinguarsarpaa
Kangerluup Ikkap naqqani napasuni meeterinik arlalinnik portussuseqarsinnaasuni enzymit, ilaatigut errorsissutinik qaqorsaasiornermi, nakorsaasiornermi aamma inuussutissalerisuni atorsinnaasorineqarput.
Atorlualersinnaanerat anguniarlugu qallunaat kalaallillu piginneqatigiiffiat - uumassusilinnik teknikki atorlugu paasiniaasarfik NunaBiotech ukiut arfinillit matuma siornagut pilersinneqarpoq. Allanilli ingiarneqariaannaavoq. Atorluaanissamimmi suliniartut nunarsuup sinnerani aallartilluareerput, taamalu pisoqarnerani Namminersorlutik Oqartussat paamaarussiuarsinnarput, taama Sermitsiaq Inuussutit allaaserinnippoq.
Nunabiotech iluanaarutigisinnaasaminik misissuinissamut Namminersorlutik Oqartussanit akueriteqqaartariaqarpoq, allaammi piginneqataanissaa siunnersuutigineqarsimagaluarluni. Sulili qinnuteqaatit taakku akineqanngillat.
-Manna periarfissaavoq annertoorujussuaq, akissutisinerli ajorpugut. Namminersorlutik Oqartussat qanoq iliuuseqanngillat, Otto S. Nielsen oqarpoq. Taanna aningasaliissuteqartarfimmik Nunafinansimik ingerlatsivoq.
Peter Stougaard Nunabiotechimi suleqataasoq Københavnip Universitetiani pinngortitalerinermut immikkoortortami, Institut for Jordbrug og Økologi-mi Kalaallit Nunaanni bakterissat enzymillu nassaassaasut pillugit ukiuni qulini ilisimatuutut sulisimasoq mianersoqqusivoq.
Nunani tamalaani suliffeqarfiit Kalaallit Nunaannik ingiaaleraluttuarput.
Nunat aqqanillit taakkununnga ilaallutik Korea Kujalleq, Kina, Polen, Holland, Indien aamma Svalbard misissuiveqalereerput.
Ajornartorsiut tamanna Namminersorlutik Oqartussat ilisimagaat Inuussutissarsiutinut Naalakkersuisoqarfimmi pisrotap Christel Lund-Jæger Hansenip erseqqissaatigaa.
-Tamanna Kalaallit Nunaanni nutaajuvoq. Taamaattumik aamma assut mianersorpugut, isumaqatigiissummik naammasisaqarnissatta tungaanut. Isumaqatigiinniarnerillu ingerlanneqartillugit annertunerusumik oqaaseqarsinnaanngilanga, Sermitsiamut oqarpoq.
