Nunatta eqqumiitsulianik saqqummersitsiveqalernissaa qanilliallattoq

- Ataatsimiititaliaq tamarmiusoq allannguutissatut siunnersuuteqarpoq. Tassalu Nunatta eqqumiitsulianik saqqummersitsivissaanik pilersitsinissamut aningaasaliinissamut aningaasaateqarfinninngaanniit siullermik nassaarniartoqassasoq. Allannguutissatullu siunnersuut taanna Naalakkersuisuninngaanniit akuersissutigivarput, kultureqarnermut naalakkersuisoq, Doris Jakobsen oqarpoq. 

Illussanik titartaasartut, Bjarke Ingels Group Nunatta eqqumiitsulianik saqqummersitsivissaatut siunnersuutaat 2011-mi unammisitsinermi ajugaasutut toqqarneqarpoq. Taamaalisukkullu nunap ilaa eqqumiitsulianik katersugaasiviliorfigineqartussaq Kommuneqarfik Sermersuumit aalajangiunneqarpoq.

Aamma atuaruk Nunatta eqqumiitsulianik saqqummersitsivissaata akuerineqarnissaa utaqqiinnaraat

Inuit Ataqatigiinneersup Muté B. Egedep siunnersuutaata tunngavilersuutaa naapertorlugu saqqummersitsivissamik pilersitsisoqassappat Naalakkersuisut aningaasaleeqataaniarlutik nalunaarutigisariaqarpaat.

Aningaasaleeqataasoqarniartorlu Doris Jakobsenip oqaatigaa.

- Kommuunip Namminersorlutik Oqartussallu Kalaallit Nunnaanni eqqumiitsulianut katersugaasiviup ingerlanneqarneranut aningaasaliinissaat naatsorsuutigineqassaaq, Doris Jakobsen oqarpoq.

Eqqumiitsulianillu saqqummersitsivissap sananeqarnera aningaasaateqarfinnit aningaasalersorneqassaaq.

- Kalaallit Nunaanni eqqumiitsulianut katersugaasivik siulersuisoqarput. Taakkulu maani sulisunik suleqateqarlutik aningaasaateqarfinni aningaasassarsiornissamut aallartissapput, kultureqarnermut naalakkersuisoq, Doris Jakobsen oqarpoq.