Nunatta eqqumiitsulianik saqqummersitsivissaata akuerineqarnissaa utaqqiinnaraat
Siunertat kusanartut oqaatigiinnarnissaat kisimi naammanngilaq, Nunatta eqqumiitsulianik saqqummersitsiviata
siulittaasua Josef Motzfeldt AG-mut ullumi taama oqarpoq.
Nunatta eqqumiitsulianik saqqummersitsivianik Nuummi pilersitsinissamut Namminersorlutik Oqartussanit politikkikkut taperserneqarnissaq taassuma maanna utaqqikatappaa.
Suliniummi taperseqanngippat suliniummut aningaasaleerusussinnaasunik pissarsisoqarsinnaanngilaq.
Nunatta eqqumiitsulianik saqqummersitsiviata illutassaanut 200 mio. kr.-inik akeqassangatinneqartumut titartakkat toqqavissalu piareeqqapput. Ulluinnarnilu ingerlanneqarneranut aserfallatsaaliinermullu ukiumoortumik 6 mio. kr.-it atorneqartarnissaat naatsorsuutigineqarpoq.
Pilersaarutit malillugit sanaartorneq februaarimili aallartereertussaagaluarpoq. Tamannali Namminersorlutik Oqartussanit politikkikkut taperserneqanngippat piviusunngortinneqarsinnaanngilaq. Taamatulli tapersiisoqarnissaa Nunatta eqqumiitsulianik saqqummersitsivissaata siulersuisuisa pisinnaasimanngilaat, Josef Motzfeldt AG-mut oqarpoq.
Kommuneqafik Sermersuup tungaanit qangali nalunaarutigineqareerpoq ulluinnarni ingerlatsinermut aserfallatsaaliinermullu aningaasartuutit 40 %-ii kommunimit akilerneqarusuttut, tamannali aatsaat pisinnaavoq Namminersorlutik Oqartussat sinneri akilerusussappatigi, borgmester Asii Chemnitz Narup oqarpoq.
- Eqqumiitsuliortorsuatta Hans Lyngep eqqumiitsuliatut erlinnartuutaani pissarsinissamut nunarput neriorsorneqarpoq. Periarfissallu taassuma qatangiinnartinneqassanngilaq, Josef Motzfeldt oqarpoq, qanittukkullu aaqqiisoqarnissaa neriuutigalugu.
AG-p kultureqarnermut naalakkersuisup Nick Nielsenip suliniut pillugu isumaanik oqaaseqartinniarsimagaluarpaa, Nick Nielsenilli aviisip saaffiginnissutaa qisuariarfigisimanagu.