Nunatta avannaarsuani ilisimatusarnermi droni sakkuginiaraat

Droni tunniunneqartoq (timmisartuaraq ungasianit aquttagaq, aaqq.) ilisimatusarfeqarfimmi Villum Research Stationimi, Nunatta avannaarsuani Qalasersuarmit kilometerinik 900-innarnik ungasitsigisumiittumi ilisimatuunit atorneqassaaq.

Ilisimatuut Danmarkimeersut nunanilu tamalaaneersut silap pissusiata allanngoriartupiloornera, tamatumalu silap pissusianut, naasunut uumasunullu sunniutai pillugit tassani ilisimatusarput.

Droni ilisimatuunut nutaanik periarfissaqalersitsissaaq

Droni tunniunneqartoq atortulersuutitigut nutaanik periarfissaqalersitsissaaq. Sermersuup misissuiffigineqarneranut ilaatigut atorneqassaaq, silallu pissusiata allanngoriartornerata sunniutaata misissuiffigineqarnerani ilisimatuunut periaatsinik nutaanik atugassaqalersitsissalluni.

Droni Aarhusip Universitetianut tunniunneqartoq Nunattalu avannaarsuarni ilisimatusarnermi atorneqartussaq nutaaliaalluinnartuuvoq piginnaasaqarluarlunilu.

Droni arlalinnik atortulersaarusersugaavoq, taakkulu issittupilussuarmi atorneqarsinnaasunngorlugit ineriartortinneqarsimapput.

- Dronit tunniunneqartut siullersaat ilisimatuussutsikkut suliniutini arlalinni sakkussatut pingaaruteqarluinnassaaq, aamma Kalaallit Nunaanni eqqaanilu sermimik sikumillu ilisimatuussutsikkut misissuinerni atorneqartussaavoq, ilisimatusarfeqarfiup pisortaa, Aarhusillu Universitetiata Avatangiisit pillugit ilisimatuussutsikkut instituttiani professori, Henrik Skov, taama oqarpoq.

Droni 25 kiilut missaannik oqimaassuseqarpoq suluusaalu isuanit isuanut 3,3 meterinik isortussuseqarlutik. Ilisimatusarnermut atortorissaarutinik 5 kiilut missaannik usisinnaavoq. Ilisimatusarnermut atortorissaarutit, nammineerluni ingerlasinnaaneranut atortut attaveqaqatigiinnermullu artortorissaarutit nutaaliaalluinnartut, katillugit 5 millionit koruunik missaannik naleqarput.