Timmisartuaraq inuttaqanngitsoq atorlugu Tunup avannaarsuani ilisimatusarniartut

Aarhus Universiteti taama nalunaaruteqarpoq.

Timmisartuaqqat ungasianiit aquttakkat pingasuussapput, siullerlu Aarhus Universitetianut pisortatigoortumik martsip 13-anni tunniunneqartussanngorluni.

Timmisartuaqqanik pisinermut Willum Fondenip aningaasaateqarfia aningaasaleeqataavoq. Timmisartuararlu inuttaqanngitsoq siulleq atulersinneqartussaq nunatta silaannaanut tulluarsarneqarsimavoq.

Taannalu Station Nordip nalaanut siullerpaamik misileraassutigineqassamaarpoq. Tassani sermersuup, aputip uuttortarnissaanut silallu pissusiata allanngoriartorneranut atatillugu misissuisoqassalluni.

- Timmisartuaraq inuttaqanngitsoq siulleq atorlugu ilisimatusarnissaq pingaaruteqarluinnaaq, Kalaallit Nunaannimi siku pillugu siunissami ilisimatusaatigineqarsinnaanngussammat, Aarhus Universitetimi avatangiisit pillugit ilisimatusarfimmeersoq ilisimatusarnissamullu aqutsisoq Henrik Skov tusagassiuutinut nalunaarummi taama oqarpoq.

Timmisartuaraq ungasianiit aquttagassaq 5 milliuunit koruunit missiliorlugit akeqarpoq. 5 kilo tikillugit atortunik usisinnaasoq, Villum Research Stationimi angerlarsimaffeqartinneqassaaq