Naalakkersuisoq danskit ministeriannut: Nunatsinnukarlutit arnat spiralilertissimasut oqaloqatigiartukkit
Timmisartumut ikeriarlutit Kalaallit Nunaannukarit arnallu naartunaveersaammik spiralilertissimasut oqaluullugit.
Taama erseqqitsigisumik kaammattuuteqarpoq Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen danskit peqissutsimut ministeriannut Sofie Løhdemut.
Pisumut ilungersunartumut danskit ministeriat aallussinngippallaartoq Naaja H. Nathanielsen isumaqarpoq.
Naaja Nathanielsen tuluit aviisiannit The Guardianimit oqaloqatigineqarluni taama oqarpoq.
- Sophie Løhde arlaleriarujussuarlugu aggersarneqarnikuuvoq, aggernissaminulli piffissaqarsimanngilaq.
-Timmisartumut ikeriarluni arnat oqaluukkiartortariaqarpai, pisumut ilungersunartumut isiginninnera allanngussagaluarpoq, Naalakkersuisoq Naaja H. Nathanielsen aviisimi The Guardianimi apersorneqarluni taama oqarpoq.
Naaja H. Nathanielsen KNR-imut qanittumi paasissutissiissutigaa spiralilersuisoqarnerani inuit pisinnaatitaaffiinut tunngasut qulaajarneqarnerat aallartinneqarniartoq naalakkersuisut paasissutissiissutigaat, qulaajaaneq taanna danskit qulaajaanerannut ilanngunneqanngilaq .
Naaja. H. Nathanielsenip taama kaammattuuteqarnera danskit peqqissutsimut ministeriannut anngunneqarnikuuvoq.
Sofie Løhde akissuteqarluni aviisimut Ekstra Bladetimut ima oqarpoq.
- Spiralilersuisoqarsimanera ataatsimoorluta oqaluttuarisaanitsinni pisoq alianartuuvoq kalaallit arnartaannut annertuumik kinguneqartitsisoq.
Taamaattumik iternga tikillugu paasineqarnissaa pingaaruteqarpoq, Kalaallit Nunaannukarnissannulli suli periarfissaqarsimanngilanga, Naaja Nathanielsenimulli qulakkeerlugu oqaatigisinnaavara pisimasoq pillugu malinnaaqqissaarama, Sofie Løhde aviiisimi Ekstra Bladetimit taama issuarneqarpoq.
