Spiralilersuisimanermi inuit pisinnaatitaaffii unioqqutinneqarsimanersut paasiniarlugu Naalakkersusiut maanna misissuisitsinialernerat, arnanut eqqugaasunut nunatsinnullu pingaaruteqarpoq. 

Inuit Pisinnaatitaaffii Pillugit Siunnersuisoqatigiit siulittaasuat Qivioq Løvstrøm taama oqariartuuteqarpoq. 

- Taama aalajangertoqarnera iluarisimaarlugulu nuannaarutigaara. Tamannami pillugu sivisuumik suaartaateqarsimavugut, taanna oqarpoq. 

Danskit naalagaaffiata suliniuteqarneratigut kalaallit arnartai tuusintilikkaat 1960-ikkunni 70-ikkunnilu spiralilersorneqarmata, inuit pisinnaatitaaffii sorliit unioqqutinneqarsimanersut paasiniarlugu misissuisoqarnissaa, qaammatip uuma aallartinneqarani Naalakkersuisunit oqaatigineqarpoq. 

Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsenip oqarnera naapertorlugu, spiralilersuisimanermik qulaajaanermut 2025-mi naammassisussamut ilutigitillugu misissuisoqassaaq. 

Inuit pisinnaatitaaffiinut tunngasut ilanngullugit spiralilersuisimanermi qulaajaanermi misissorneqarnissaat ukiuni arlalinni, ilaatigut FN-imit, Inuit Pisinnaatitaaffii Pillugit Siunnersuisoqatigiinnit aamma ICC-mit suaartaatigineqareersorlu Naalakkersuisut taama aalajangerput.

Taamaammallu misissuinerup piviusunngulernera ICC-mi siulittaasup Sara Olsvigip aamma iluarisimaarpaa. 

- Inuit pisinnaatitaaffiisa ilanngullugit sammineqarnissaasa pingaaruteqarnera Naalakkersuisunit akuersaarneqalermat iluarisimaarnaqaaq, taanna oqarpoq.

Sinaakkutit isumaqatigiissutigigaat

Taamaattorli spiralilersuisimanermik qulaajaanermi maanna ingerlasumi inuit pisinnaatitaaffii sammineqanngimmata Sara Olsvigip uggoraa. 

Inuit pisinnaatitaaffiisa unioqqutinneqarsimanerannik nassuerneq qulakkeerlugu naalakkersuisunit taakkunannga marlunnit ersersinneqassappat, ataatsimut qulaajaasitsisoqarnissaa taassuma orniginartinnerugaluarpaa. 

- Inuit pisinnaatitaaffiisa ilungersunarluinnartumik unioqqutinneqarsimanerat uatsinnut ersarissorujussuuvoq, Sara Olsvig oqarpoq. 

Spiralilersuisimanermik maanna qulaajaanermik suliami inuit pisinnaatitaaffiinut tunngasut ilanngullugit misissorneqarnissaat Nalaakkersuisunit kissaatigineqartuarsimasoq, Naaja H. Nathanielsen oqarpoq. Danskilli naalagaaffiata tamatumunnga itigartitsisimanera taassuma KNR-imut oqaatigaa. 

Tamannali danskit ministeriunerannit Mette Frederiksenimit taama isigineqanngilaq. Taassuma spiralilersuisimaneq pisutut alianarluinnartutut taavaa, naalakkersuisullu marluusut suliamut tunngatillugu suleqatigiilluarsimanerarlugit. 

- Misissuinissami sinaakkutissat pillugit isumaqatigiippugut. Kalaallit Nunaat annertunerusumik misissuerusuppat akuliuffigissanngilara, kisianni suliamut tunngatillugu suleqatigiilluarnerput misigaara. Mette Frederiksen sapaatit akunnerata siuliani Nuummut tikeraarnermini KNR-imut taama oqarpoq. 

Inuit pisinnaatitaaffiisa unioqqutinneqarsimanerannik misissuinermut tunngasumik sukumiinerusumik, apriilimi saqqummiussinissaminik naatsorsuuteqarluni Naaja H. Nathanielsen KNR-imut paasissutissiivoq.