Nunatsinnit atuagaq nunat avannarliit siunnersuisoqatigiivisa nersornaasiinissaannut innersuunneqartoq
Assiliartalersorlugu atuakkiaq ”Orpilissat nunarsuarmi kusarnarnersaat” nunatsinnit Nunani avannarlerni meeqqanut inuusuttunullu atuakkiani pitsaanerpaatut innersuunneqarpoq.
Nunat avannarliit meeqqanut inuusuttunullu atuakkiamut nersornaasiinissaanut nunanit avannarlernit atuakkiat katillugit 14-it innersuunneqarput.
Reykjavikkimi oktobarip 27-anni nersornaasiisoqassaaq.
”Orpilissat nunarsuarmi kusanarnersaat” Juaaka Lyberthimit aamma Maja-Lisa Kehletimit atuakkiarineqarpoq.
AAMMA ATUARUK Tuttuarannguaq pillugu atuakkiaq nersornaasigassatut innersuunneqartoq
Atuagaq juulleriartorneranni Uummannami misigisassarsiornermut tunngavoq. Illoqarfimmi inuit niuertup Hammekenip juullimut orpinnik illoqarfimmut tikisinneqartussanik inniminniisimannginnera isumatsassimassutigalugulu aliasuutigaat. Tamannalu nukappiaqqap Kunuup iliuuseqarfiginiarpaa – taannalu nissiaqqamit ikiorneqarpoq. Maja-Lisa Kehlet atuakkamut assiliartalersuisuuvoq.
Juaaka Lyberth oqaluttualiaq Naleqqusseruttortut 2012-imi saqqummersikkamiuk atuakkiortutut saqqummeqqaarpoq. Atuakkiaq taanna Nunat avannarliit siunnersuisooqatigiivisa atuakkiamut nersornaasiuttagaanut 2014-imi innersuunneqarpoq.
Nersornaaserneqartoq nersornaammik aningaasanillu 350.000 koruuninik pissarsisussaavoq.
”Orpilissat nunarsuarmi kusanarnersaat” nunat avannarliit killiit siunnersuisooqatigiivisa meeqqanut inuusuttunullu atuakkianut nersornaasiuttagaanut januaarimi aamma innersuunneqarpoq. Tassani nersornaaserneqartoq Savalimmiuni novembarimi saqqummiunneqassaaq.
