Kalaallit Nunaannit Danmarkimut tikittut immikkoorsimaartariaqanngitsut
Danmarkimut tikikkuit immikkoorsimaarnissannut sillimasariaarupputit.
Ulluni qulini immikkoorsimaarnissamut malittarisassat kingulliit Danmarkimut nunanit allanit tikittunut tamanut - coronavirusimik tunillanneqarsimanersut tunillanneqarsimannginnersulluunniit apeqqutaatinnagu - atuuttut, Kalaallit Nunaannniit Savalimmiuniillu Danmarkimut tikittunut atuutinngillat.
AAMMA ATUARUK Danmarkimut tikittut mattusimasalissasut
Danskit peqqissutsimut ministeriat, Magnus Heunicke, Folketingip Kalaallit Nunaat pillugu ataatsimiititaliaanut akissummini erseqqissaavoq.
- Kalaallit Nunaanniit Savalimmiuniillu Danmarkimut tikittut immikkoorsimaarnissamut piumasaqaateqarfiginissaannut aalajangersagaqanngilaq, taanna allappoq.
Tamanna peqqinnissamut tunngasut amerlanerpaartaat, aamma nappaalanermut tunngasut, Kalaallit Nunaannit akisussaaffigineqalersimanerannik peqquteqarpoq. Savalimmiuni akisussaaffiit nappaalanermut tunngasut Danmarkimit suli isumagineqarput, malittarisassalli kingulliit savalimmiormiunut atuunnatik.
Kalaallit Nunaanniit aallarnak
Naalagaaffeqatigiit avataaniit Danmarkimut tikittunut tamanut ulluni qulini immikkoorsimaarnissamut malittarisassat februaarip ulluisa 28-at ilanngullugu atuupput.
Nunatsinniilli Danmarkimut piffissami kingullermi ullunilu makkunani angalasoqarpianngilaq.
Nunatsinnimi oqartussat nunatsinniit nunatsinnullu pisariaqavinngitsumik angalaqqusinngillat. Tamanna nunatsinnut angalanermut apriilip ulluisa 18-iata tungaanut killilersuisoqarneranik peqquteqarpoq. Tassa imaappoq, nunatsinniit aallarsimaguit nunatsinnut imaaliallaannaq utersinnaanissat naatsorsuutigissanngilat.
AAMMA ATUARUK Nunatsinnut angalasoqarnissaanut killilersuinerit apriilip 18-ianut sivitsorneqartut
Oqartussanimmi akuerineqarsimasut kisimik, tassa inuit corona pillugu allattoqarfimmit akuerineqarsimasut kisimik, nunatsinnut isersinnaapput.
Tamanna Naalakkersuisut oqarnerat naapertorlugu marlunnik, tassa nunatsinni kommunit akornanni angalanermut killilersuinernik qasukkaanermik coronavirusillu ilaannik Tuluit Nunaanneersumik Danmarkimi tuniluutileruttortumik siaruatsaaliuinermik peqquteqarpoq.
