Tusagassiortup mailianut takkuttoqarpoq. Tassaana tusagassiuutinut nalunaarut. Tusagassiortullu taanna atuariarlugu nutaarsiassatut allaaserisaa. Nutaarsiassat pingajorarterutaat taamaalillutik radiokkut, tv-kkut nittartakkatigullu nunatsinni saqqummersinneqartarput. Nalunaarusiaq 'Tusagassiuutit 2018 - Kalaallit Nunaanni tusagassiuutinik misissuineq' taama takutitsivoq.
 
Nalunaarusiornermi allaatiginnittut ilaat, Naimah Hussain, naapertorlugu tamatumunnga pissutaasut amerlapput. Siullertut, kalaallit tusagassiorfiini sulisuni tamanna ileqquliutiinnagaasimasinaavoq:
 
- Tusagassiuutinut nalunaarummik takkuttoqaraangat saqqummersinnissaa sungiussimasaavoq, Naimah Hussain radiokkut aallakaatittakkamut, Nunatta Nipaanut oqarpoq. Tamassuma saniatigut kultur oqaluttuarisaanerlu nassuiaatissaanerarpai. Kalaallimmi tusagassiorfii Namminersorlutik Oqartussat paasissutissiisarfiattut siornagut isigineqartarsimasut, Naimah Hussainip oqaluttuarpoq.
 
- Taamaaliortarnerli maanna qaangiussimalerpoq, kisianni soorluuna Namminersorlutik Oqartussat politikerillu qangali naatsorsuutigisaraat, oqaluttuariumasatik tusagassiortut oqaluttuarissagaat, allaaserinnittoq oqarpoq, erseqqissarluguli taamaaqqajaaneq ukiuni makkunani allanngoriartortoq

AAMMA ATUARUK Immikkut ilisimasallit amigaataapput

Ilanngutassiat tamarmik allaqqitaasarput

Nutaarsiassat 70 procentii suliarineqanngitsuunerat amerlagineqarsinnaanerat, KNR-ip nutaarsiassaqarnermut pisortaata, Mikkel Bjarnø Lundip akuersaarpaa, nunatsinnilu tusagassiorfiit allanik suliaqaratik issuaaginnartutut misigineqarpata paasilluarsinnaavaa.  Tamannali ilumoortuungitsoq oqarpoq:
 
- Tusagassiortut sulisutta tamarmik tusagassiassatik tusagassiortutut ullut tamaasa suliarisarpaat, telegramminullu natsunnguanut allaat pingaarnersiorneqarlutikm misissorneqarlutik  isummerfigineqarlutik nutaamik allaqqitaasarput. Telegramminik ilanngussisaraangatta, tamakkua atuisutsinnut naleqartutut isigisarnerat pisutaavoq, Mikkel Bjarnø Lund Nunatta Nipaanut oqarpoq.
 

AAMMA ATUARUK Tusagassiuinermi sulisut peqatigiiffiata KNR isornartorsioraa

Nutaarsiassat nunatsinneersut procentii arfinillit nammineq suliaasut, nalunaarusiami aamma erserpoq. Sanilliussigaanni Danmarkimi nutaarsiassat 26 procentii  nammineerluni suliaasut, Danmarkimi tusagassiuutinik 2012-imi misissuinerup takutippaa.