Nunatsinni nutaamik partiiliortoqarnissaa Espersenip kajumissaarutigigaa

Namminiilivinnissamik kissaateqarneq Inatsisartuni politikerinut tappiillisitsivoq, Søren Espersen taama isumaqarpoq. Nunatsinni partiimik Naalagaaffeqatigiinnerup ingerlaannarnissaanik kissaateqartumik Nunattalu ajornartorsiutaanik aaqqeerusuttumik ujartuivoq.
Dansk Folkepartiip Kalaallit Nunaannut tunngasunut oqaaseqartartua, Søren Espersen Assi © : Toqqorsivik/Arkiv
septembarip 19-at 2016 07:21
Nutserisoq Simon Uldum -

Innuttaasorpassuit Naalagaaffeqatigiinniiginnarusuttut Inatsisartuni partiinit sinniisuuffigineqanngillat. Dansk Folkepartiip Kalaallit Nunaannut tunngasunut oqaaseqartartua, Søren Espersen, taama isumaqarpoq:

- Inatsisartuni partiit tamarluinnarmik assigiimmik oqalupput. Taamaammat partiimik nutaamik pilersitsisoqarnissaanik ujartuivunga, taannalu Atassutip qanga anguniagaata assinganik anguniagaqassaaq, tassalu Danmarkimut Naalagaaffeqatigiinnullu ataqatigiinnissamik anguniagaqarluni. Tamatumunnga qinersisussaqartoq nalunngilara, KNR-imut taama oqarpoq.

Partiimik nutaamik ujartuinera Dansk Folkepartiip ukiumoortumik ataatsimeersuarnerani sapaatit-akunnerata naanerani ingerlanneqartumi pivoq, Espersenillu aamma danskit politikerii namminersorluni oqartussaanerup ataqqineqarnissaa paatsoorlugu Kalaallit Nunaannik ajornartorsiutaanillu isiginngitsuusaarnerarlugit isornartorsiorpai.

Ataasiinnarmik isumaqarlutik avammut saqqummersartut...

Søren Espersen naapertorlugu, Inatsisartuni partiit isumaqatigiillutik Nunatta namminiilivinnissaminik ilungersuuteqartariaqarneranik avammut saqqummertarput. Mikrofonili qamikkaangat isuma allaanerulaartartoq tutsiuttartoq oqaatigaa:

- Kisimeeqatigalugit oqaluukkaanni, namminiilivinnissamik oqalunnerup ingasappallaalersimaneranik Danmarkillu Naalagaaffeqatigiinnarnissaanik kissaateqartoqarneranik ilaatigut oqartoqartarpoq.

Demokraatit kisiartaallutik Danmarkimut ataannarnissamik partiip kissaateqarneranik tamanut ataasiakkaanik nalunaaruteqartarsimanera tikkuarpaa, taamatullu nipilimmik nalunaaruteqartoqartarnera maanna "qaqutigoortupilussuanngorsimasoq".

Aamma atuaruk Espersen Nunatta aningaasaqarneranik isornartorsiuisoq

Partii nutaaq ajornartorsiutinik aaqqissaaq

Taamaammat innuttaasut Danmarkimut Kalaallit Nunaannik ikiuisinnaasumut ataqatigiinnerup nukittorsarneqarnissaanik kissaateqartut sinniisuuffiginissaannut iliuuseqartoqartariaqarpoq, Søren Espersen taama isumaqarpoq.

Taamaaliortoqarneratigut nunami maanna ajornartorsiutaasut sammineqalissapput namminiilivinnissamillu takorluukkersaarutit sammiunnaarneqarlutik.

- Kalaallit Nunaata aningaasaqarnerata annaanniarnissaa pillugu, aammalu nunamit qimarrattoqannginnissaa pinngitsoortinniarlugu Kalaallit Nunaanni inuiaqatigiit annaanniarnissaat pillugu oqallittoqartariaqarpoq (..). Kalaallit Nunaanni ineriartorneq siumut-saatsinneqartariaqarpoq namminiilivinnissamik oqalunneq inatsisartuni politikerinut nukillaarsaataasoq piunnaarlugu.

Kalaallit Nunaata namminiilivinnissaa pillugu innuttaasunik taasititsisoqassagaluarpat, Dansk Folkepartii tamanna sioqqullugu Naalagaaffeqatigiit pillugit sukumiisumik paasititsiniaassasoq aamma ilanngullugu oqaatigaa.