Nunatsinni nunap ilua pillugu ilisimatusarneq 2030-mut sivitsorneqarluni isumaqatigiissutigineqartoq
Danmarkimi Kalaallit Nunaannilu ujarassiuutut misissuiffik GEUS nunatsinni nunap ilua pillugu ilisimatusarnera ingerlaannarnissaaq.
Aatsitassanut, Inatsisit Atuutsinneqarnerannut Naligiissitaanermullu naalakkersuisup Naaja H. Nathanielsenip, Danmarkillu silap pissusianut, nukissiuutinut pilersuinermullu ministeriata Lars Aagaardip suleqatigiinnissamut isumaqatigiissut nutarterneqartoq atsioqqammerpaat.
GEUS-ip aamma Namminersorlutik Oqartussat akornanni 2030 tikillugu ilanngullugulu aatsitassanut suliassaqarfimmi suleqatigiinnissaannut sinaakkutissat isumaqatigiissummi nassuiarneqarput.
Ilisimatusarneq naalakkersuisut aatsitassarsiornermik ineriartortitsinerannut ilaasoq, Naaja H. Nathanielsenip tusagassiuutinut nalunaarummi allappaa.
- Aatsitassarsiornermik inuussutissarsiuteqarneq Kalaallit Nunaanni isertitanut annertunerusumik tunngavissaliissasoq pillugu Naalakkersuisut politikkikkut anguniagaannut tunngatillugu Kalaallit Nunaannut aaqqiissutissanut pitsaanerpaamut tapersersornissaannut tapersiinissamullu Naalakkersuisut aamma danskit naalakkersuisuisa akornanni sivisuumik, qanimut pilersitsiviulluartumillu suleqatigiinneq suleqatigiinnissamut isumaqatigiissummi tunngavilerneqarpoq, Naaja H. Nathanielsen nalunaarummi allappoq.
Isertitanut tunngavissaqarneruneq
Aatsitassariorneq nunatsinni isertitanut annerusumik tunngaviunissaa naalakkersuisut politikkikkut anguniagarigaat nalunaarummi aamma allassimavoq.
- Ilisimatusarneq Kalaallit Nunaannut aningaasarsiortitsissaaq aammalu tapersersussallugu pingaaruteqarluni. tamanna suleqatigiinnissamut isumaqatigiissummi Naalakkersuisut sinnerlugit atsiukkanni ilaatinneqartut pingaarnerit ilagaat, Naaja H. Nathanielsen oqarpoq.
Danskit silap pissusianut ministeriat, Lars Aagaard ilanngussivoq:
- Danskit tungaanniit Kalaallit Nunaata aatsitassanut suliassaqarfik suliffissuaqarnermi pingaaruteqarluinnartunngorlugu allanngortinniarlugu suliaqarneranut pingaaruteqartumut ilisimatusarnermik tapersiisinnaagatta nuannaarutigisorujussuuara, taanna nalunaarummi oqarpoq.
