Kalaallit Nunaanni nakkutilliinerusoqarnissaa pillugu isumaqatiginninnialeruttortut
Kikkut Kalaallit Nunaata imartaaniinnersut, nunataaniinnersut silaannaaniinnersullu taakkunanilu susoqarnersoq nakkutilliinerusoqartariaqarpoq.
Folketingimi politikerit amerlanerussuteqartut tamanna 2019-imi aalajangermassuk Kalaallit Nunaanni nakkutilliinerunissamut 1,5 milliardit koruuninik saniatigut aningaasaliipput.
Danmarkimili partiit aningasat taakkua qanoq agguarneqassanersut aatsaat isumaqatiginninniutigileruttorpaat. Naalakkersuisut suleqatigilluarnerisigut taamaaliorput.
Nunanut allanut naalakkersuisoq Steen Lynge (D) apersorniaraluarparput, iluatsinngitsumilli. Kisianni IA-mit Folketingimi ilaasortaq, Aaja Chemnitz Larsen, isumaqatiginninniarnernut ersarissunik kissaateqarpoq.
1,5 milliardit koruuninik Issittumi nakkutilliinerunissamut aningaasaliineq
Folketingip illersornissaq pillugu isumaqatigiissutitaaq 2018-imi akueraa. Saniatigut 4,8 milliardit koruuninik Illersornissaqarfimmut 2023-p tungaanut aningaasaliinissaq isumaqatigiissutaavoq.
Partiit illersornissaq pillugu isumaqatigiissusiortut sualummik Atlantikup Avannaani Issittumilu 2023-p tungaanut nakkutilliinerunissamut saniatigut 1,5 milliardit koruuninik 2019-imi aningaasaliipput. Aningaasat taakkua qanoq agguarneqassanersut isumaqatiginninniutigileruttorpaat.
Danskit naalakkersuisui Socialdemokratit, Venstre, Konservative, Liberal Alliance Radikale Venstrelu illersornissaq pillugu 2018-imi isumaqatigiissusiortut isumaqatiginninnialeruttortuupput.
Folketingimi ilaasortat nunanit avannarlerneersut isumaqatiginninniaqataanngillat. Isumaqatiginninniarnerilli Naalakkersuisullu ataqatigiissarneqartut, danskit sillimaniarnermut ministereqarfiat ilisimatitsivoq.
Taanna Christiansborgimilu politikerit nunat avannarlerneersut allat isumaqatiginninniaqataanngillat. IA-li aalajangiissuussagaluaruni nunatsinni inuussutissarsiornermik aallussallit isumaqatiginninniaqataassagaluarput.
- Nunatsinni inuussutissarsiornermik aallussallit, Air Greenlandiusinnaavoq Royal Arctic Lineuisinnaalluniluunniit, nakkutilliiffiusartuni suliaqartoreermata nakkutilliisooqataatitaalerunik Illersornissaqarfimmiilluunnit nakkutilliisuutitaalerunik isumatusaarnerussaaq, taanna oqarpoq.
RAL-ip pisortaanera Verner Hammeken tamanna pillugu apersorneqarusunngilaq.
Air Greenlandilli pisortaanera, Jacob Nitter Sørensen, Illersornissaqarfiup nunatsinni nakkutilliinerulernissaanut ikiuunnissamut piareersimavoq.
- Siullermik ataqatigiissaarisareerpugut. Atortorissaaruteqarnikkut, sulisoqarnikkut misilittakkatigullu. Taamaammat taakkunatigut assigaannilluunniit annertoqqutaasinnaavugut. Periarfissarpassuupput, aamma aserfallatsaaliuinermi, taanna KNR-imut oqarpoq.
Innuttaasut nakkutilleeqataatinneqassasut
Issittumi Sakkutooqarfik Kalaallit Nunaanni Savalimmiunilu ukioq naallugu alapernaarsuutinik arfineq-marlunnik umiarsuaqarlunilu angallataateqarpoq.
Aamma silaannarmi nunamilu nakkutilliisuutinik timmisartoqarpoq. Tunup avannaarsuani qumusserluni aamma alapernaarsuisoqarpoq.
Taakkuali Kalaallit Nunaanni isorartuumi tamarmi tamakkiisumik nakkutilliisinnaannginnerat isornartoqartoq, Aaja Chemnitz Larsen isumaqarpoq.
AAMMA ATUARUK Espersen: Illersornissaqarfiup Kalaallit Nunaat navialitsaalinerulertariaqarpaa
- Ruslandimit aqqartartoqartarlunilu Sermersuarmimi assigiinngitsunik sianiginngisatsinnik pisoqartartoq tusartarparput, taamaammat nakkutilliinerusoqartariaqarpoq.
Kalaallillu inuusuttut sualummik Danmarkimi Illersornissaqarfimmi sakkutuunngorniat ikiuussinnaasut, taanna isumaqarpoq.
- Kalaallit inuusuttut ilarpassui sakkutuunngorniartarput. Nunatsinnilu sakkutuunngorniarfeqartuuppat sakkutuunngornissamik soqutiginnittut amerlanerussagunaraluarput, Aaja Chemnitz Larsen oqarpoq.
Sakkutuunngorniat immami annaassiniarnermik, sikusiornermik avinngarusimasunullu pilersuinermik ilinniarfigisinnaasaannik Kangerlussuarmi sakkutuunngorniarfeqalernissaq, taassuma kissaatigaa.
Siumumit Folketingimi ilaasortaq, Aki-Matilda Høegh-Dam, tamanna pillugu apersorniaraluarparput, iluatsinngitsumilli.
