Nunatsinni inuussutissarsiutit pingaarnerpaat nalliuttorsiutigineqartoq

Aalisartut piniartullu ulluat nunatsinni sumiiffinni arlalinni assigiinngitsutigut malunnartinneqarpoq.

Naak sila angalaarfissaqqikkaluaqisoq Nuummi sumiiffinnilu allani aalisartut piniartullu ulluannik malunnartitsiniarnermi naalagiaqatigiittoqarpoq, ileqqorlu malillugu erfalasulisartoqarpoq.

- Aalisartut piniartullu nuannarisarpakka uanga, imaannanngitsumik inuutissarsiuteqartut ilungersornartumik ilaanni naammagittarnerujussuarmik pillit, palasi naalagiartitsinermini ilaatigut oqarpoq.

Naalagiartitsinermilu oqaatsit kimittuut pissatsinnartullu, Nuummi aalisartut piniartullu peqatigiiffianni siulittaasup, Niels Boassenip Nuummi naalagiaqataasup oqarpoq.

-  Naalagiarneq immini isumalerujussuuvoq, aamma palasip oqaaseqaatai kimittuut ersarissut aammalu pissatsinnartumik misigititsisarput naalagiareernerup kingorna aamma taanna unnersiutigineqartuartarpoq, Niels Boassen naalagiaqatigiinnerup kingorna oqarpoq.

Ajunaarsimasut ullormi aamma eqqaaniarneqartut

Aalisartut piniartullu naalagiarnerup kingorna oqaluffiup silataani eqqaassutissap eqqaani katersuupput.

-  Aalisarnermik piniarnermillu inuutissarsiutillit, aamma imaatigut ajunaarsimasut ataqqiniarlugit ilaqutaallu misiginneqataanermik takutitsinissaq siunertaralugu taamatut novembarip 15-iani Nuummi Aalisartut Piniartullu Peqatigiiffiata una pilersinnikuuaat eqqaassutissaq, Niels Boassen oqarpoq.

Aalisartut piniartullu eqqaassutissap eqqaani naasortaliillutillu tussiarput.

Niels Boassenilu naalagiartitsinermik sivisuumik eqqaamannittussani kisimiinnaviarnani ilimagaa, aalisartummi piniartullu takkuttut aamma eqqaamalluassavaat.

- Soorlu taakku oqaatigineqartut ullut makku piffiit pisimasut taavalu anersaakkut palasimiit nukittorsarneqarneq pinngitsoorani arlaatigut angalaalernermiaasit  eqqaallattaagassaassapput.