Nunatsinni illoqarfimmi avinngarusimanerpaami timmisartukkut attaveqaasersuutit ajornakusoortut

Kalaallit Nunaanni illoqarfiit avinngarusimanerpaartaat. Takornarianut pilersaarummi Ittoqqortoormiit taama nassuiaatigineqarpoq.

Taamaammat nunatta kangiani illoqarfimmi innuttaasunut angallannermi attaveqaasersuutit qaqutigoortut atugassarititaanerannut pissutaagunarpoq. Illoqarfimmulli illoqarfimmiillu angalaniarneq maannakkut immikkut ittumik ilungersunarpoq.

Nunammi immikkoortuani mittarfimmut Nerlerit Inaannut timmisartumi inissat takornarianit piffissaq sivisooq sioqqullugu inniminnigaareerajupput.

Tamanna Kommuneqarfik Sermersuup borgmesteriata, Avaaraq Olsenip (S) innuttaasunut qaammatip siuliani ataatsimiititsinerani saqqummiunneqarpoq. Ittoqqortoormiinimi innuttaasut nunaqavissunut takornariatulli piffissaqarluarnikkut angalanissamut inniminniineq ajortunut timmisartukkut inissat amigaataanerat pingaartumik ernumassutigalugu oqaatigaat, taassuma oqaatigaa.

- Oqariartuutigivaat, ingerlaqatigiinniat amerlanngikkaluarlutik timmisartumi inissanik inniminiinissamut periarfissaqarneq ajorlutik, timmisartut ulikkaajaartarsimanermik, takornariat billitsinik pisiaqajaartarmata, Avaaraq Olsen Ittoqqortoormiini inunnit saaffiginnissutit pillugit nassuiaavoq.

Borgmesterip nunatta avannaata kangianut tikeraarnissaminik pilersaarusiornermini tamatuma ilungersunarnera nammineq aamma maluginiarpaa.

- Angalasussat amerlasimavugut, taamaammat ajornartorujussuusimavoq, tamatta angalanissatsinnut timmisartumi inissaqarniarnissarput. Tamatuma kingunerisimavaa, timmisartumik immikkut attartortariaqarsimanerput, Avaaraq Olsen oqarpoq.

Takornariat timmisartut ulikkaartaraat

Ittoqqortoormiinit nunatta sinneranut toqqaannartumik aqquteqannginnera timmisartukkut attaveqaasersuutit ilungersunarneranni pissutaasut ilagaat. Angalasut tamarmik Nerlerit Inaanni mittarfimmit Island aqqusaaqqaarlugu nunatta sinnerani sumiiffinnut allanut angalasinnaapput. Tassanimi islandimiut timmisartuutileqatigiiffiat Islandip avannarpasissuanut Akureyrimut ataasinngornikkut angallassisarpoq, sisamanngornikkullu Reykjavikkimut, taakkunanngalu Nuummut imaluunniit Kulusummut ingerlaqqinnissamut billetsersisoqarsinnaavoq.

- Uku nakorsiarniarniarlutik angalaniarnermi ajornartorsiuteqartut soorunami immikkut maluginiagassaapput. Naapitaqarpugut sivisuumik kinguaattooqqasimallutik apuunneq ajuleqqasut, borgmesteri oqarpoq.

Timmisartukkut attaveqaasersuutini atorneqarnikuusimasoq tassa illoqarfiit pingaarnersaannut toqqaannartumik attaveqaasersuutit innuttaasut noqqaassutigisaasa ilagaat.

Kiffartuussinissamut isumaqatigiissummut nutaamut 2017-imi isumaqatigiinniarnerup siornatigut pingasoqiusamik timmisartuussisarneq aqqutigalugu Nuummut toqqaannartumik attaveqaasersuuteqaraluarpoq, tassanilu Islandip, Kulusuup, Ittoqqortoormiit aamma Nuup Kulusuup Ittoqqortoormiillu akornanni attaveqaasersuuteqaraluaraluarluni.

Ittoqqortoormiiniillu Ittoqqortoormiinullu angallannermut attaveqaasersuuteqartitsiniarneq ajornakusoortoq, Avaaraq Olsenip erseqqissaatigaa, illoqarfimmi mikivoq, takornariaqarnerlu aamma inuussutissarsiuteqarnermut pingaaruteqarmat aamma taakku inissaqartinneqartariaqarlutik.

- Soorunami takornariaqarneq ajorinngilarput, aamma ineriartorfiusussaavoq illoqarfimmut, taanna oqarpoq, susassaqarfimmullu susassaqartut aaqqiissutaasinnaasut pillugit oqaloqatiginiarlugit erseqqissaatigaa.

Timmisartuutileqatigiiffik aaqqiissuteqarniarluni suliaqartoq

Ineqarnermut attaveqaasersuutinullu naalakkersuisoq, Hans Peter Poulsen (S) susassaqartut ilagaat.

Taassuma naalakkersuisut borgmesterimit suli saaffigineqarsimanngitsut Ittoqqortoormiinili ajornartorsiutaasoq ilisimaneqartoq paasissutissiissutigaa.

- Borgmesterip naalakkersuisoqarfimmut saaffiginninnissaa utaqqimisaaraluarparput, kisianni ilisimavarput aammalu Nordlandair angalatitsivik attaveqarnera attaveqarfigivarput oqaloqatigalugulu, taanna oqarpoq.

Hans Peter Poulsenip oqarnera naapertorlugu timmisartuussiniarneq upernaakkut ukiakkullu ajornartorsiutaanerpaasarpoq. Taamaammat Nordlandair oqaloqatigaa, tassangalu aaqqiissummik suliaqartoqarpoq:

- Sapaaatit akunnerannut marloriarlutik (Nordlandairip aaqq.) timmisartortarnertik ilisimatitsissutigaat, sulissutigalugu pingajuanik amerliniarlugu, taavalu kingusinnerusukkut timmisartunik anginerusunik atuiniarlutik nalunaaruteqarput, taanna oqarpoq.

Tamatumali qaqugu pinissaa nalunaarutigineqanngilaq. Tamatumali tungaanut Hans Peter Poulsenip innuttaasut angalanissaminnut inniminniiniarnermik ajornartorsiuteqarunik illoqarfimmi angalatitsivimmut Nanu Travelimut saaffiginnittarallaannarnissaat kaammattuutigaa.