Nunatsinni iliuuseq nutaaq: Amerikamiut nioqqutissaataannik pisiumajunnaarneq
Coca Cola. Heinzimit ketchup, Lay’simit chipsit, Colgatemit kigutinut qaqorsaat, Pampersimit nangit. Nunatsinni pisiniarfiit amerikamiut nioqqutissaataannik ulikkaarput. Minik Langelu aalajangiisinnaagaluaruni amerikamiut nioqqutissaataannik pisisoqartarunnaassaaq.
- Amerikamiut paasitittariaqarpagut nunarput pillugu USA-p præsidentiata (Donald Trump aaqq.) oqaatigisartagai akuersaaginnarneqarsinnaanngitsut, taanna oqarpoq.
Minik Langep facebookikkut qupperneq ‘boykot amerikanske varer i Grønland’ kalaallisuunngorlugu ‘amerikamiut nioqqutissaataannik nunatsinni pisiumajunnaarneq’ pilersippaa. Taassuma qupperneq marsip sisamaanni pilersimmaguli ilaasortat 1.700-t missaanniilereerput.
Pisiumajunnaarniarneq amerikamiut præsidentiata nunatsinnik aqutsilerusunnerminik arlaleriarluni oqaaseqarnerata kingunerisaanik pivoq.
Donald Trump nunatsinni “tiguaasinnaanermut” tunngatillugu eqqarsaateqarsoq sapaatip akunnerata siuliani tusagassiortunik katersortitsinermi aperineqarpoq. Tiguaaneq nammineq naalagaaffigisamut ilanngutitsinermik isumaqarpoq.
- Taamaattoqarnissaa ilimagaara, amerikamiut præsidentiat akivoq.
Nipaatsumik akerliussutsimik takutitsineq
Minik Langep kalaallit innuttaasut aningaasaataat Donald Trumpimut takussutissiisinnaassasut neriuutigaa.
- Amerikap præsidentiata oqaatigisai pillugit nipaatsumik akerliunera takutikkusullugu qupperneq pilersippara. Aammalu ataqqinninngippalaartumik Kalaallit Nunaannut pissusilersornera pillugu. Suut pisiarinerlugit eqqarsaatiginerusinnaavarput. Pisiassat Europameersut Canadameersulluunniit pisiarinerusalersinnaagaluarpagut, taanna oqarpoq.
Amerikamiut præsidentiat nunatsinnik taamaallaat takorluugaqanngilaq. Donald Trumpimmi Canadap Panamami Ikerasaliallu USA-mut aamma ilanngunnissaat anguniarlugu oqaatiginikuuaa.
Tamanna pissutigalugu Panamami inuit tusindilikkaat akerliussutsimik takutitsipput. Nunatsinni inuit Nuummi Sisimiunilu Donald Trumpip iliuusaanut akerliussutsimik arfininngormat takutitsipput, – tamannalu nunatsinni akerliussutsini takutitsinerni annerpaalluni.
Akerliussutsimillu takutitsinerit amerlanerusinnaasut Minik Lange isumaqarpoq.
- Panamami tamanna pillugu inuit tusindtilikkuutaat akerliussutsimik takutitsipput. Tamaani innuttaasuniit taamaattoqarnissaa maqaasilaarsimavarput. Aammalu takutikkusullutigu nunarput nammineq pigalugu, taanna oqarpoq.
Danmarkimi amerikamiut nioqqutissaataannik pisiumajunnaarniartut aamma amerliartupallapput. Facebookimi qupperneq ‘Boykot varer fra USA’ tassa kalaallisuunngorlugu ‘USA-mit nioqqutissat pisiarisarunnaarlugit’ maanna 89.000-t sinnerlugit ilaasortaqarpoq.
Tamanna Trumpip nunatsinnut atatillugu oqaaseqarneranik aamma Europamit nioqqutissarpassuarnut akitsuusiinissamik siorasaaruteqarneranik pissuteqarpoq.
