Folketingimi ilaasortat Nunatsinneersut attaveqatigiinnerat pitsaanngitsoq
Kalaallit maanna folketingimut ilaasortaatitaat attaveqatigiinnerat isumaqatigiinnermikj ikinngutigiinnermilu ilisarnaateqanngilaq. Taama oqaatigilluaannagassaavoq.
Anna Wangenheimip Demokraatiniit Folketingimut qinigassanngortittup Aaja Chemnitzimip Aki-Matilda Høegh-Damimillu nunatsinnut pitsaanerpaaq pillugu Folketingimi suleqatigiilluannginneranik isornartorsiuinerata kingorna, maanna folketingimi ilaasortat marluullutik tamanna KNR-imut nassuerutigaat.
- Nunarput sinnerlugu folketingimiittut suleqatigiissinnannginnerat assut unammillernarpoq, pitsaanerusariaqarput, Anna Wangenheim oqarpoq.
Eqqortortaqartorlu, Aki-Matilda Høegh-Dam KNR-imut nassuerpoq.
AAMMA ATUARUK Nunatsinni partiit Folketingimut qineqqusaarnermi pingaartitaat makkuupput
- Tassami ajunngitsutut nalilersinnaanngilara, kisianni aamma ajortutut nalilersinnaanngilara. Aajalu immikkoorluta suleqateqartarpugut. Ulluinnarni immitsinnut atassuteqarfigivallaanngilagut.
Taassuma Christiansborgimi Siumukkut suleqatigisartagai assigalugit Inuit Ataqatigiinneersunik suleqatiginnittarlutik nassuiaatigaa.
- Arlaatigut politikkikkut susoqartillugu isumaqatigiinniarsinnaasarpugut, taava isumaqatigiinniarnermi imaassinnaavoq isumaqatigiissinnaanngitsugut, naaperiarsinnaanngitsugut. Ilaanni aamma ulloqartarpugut isumaqatigiissinnaasarluta naaperiarsinnaallutalu. Naaperiarsinnaagaangatta suleqatigiinnerput pitsaasumik nalilersinnaavara, Aki-Matilda Høegh-Dam oqarpoq.
Aaja Chemnitzilu suliat nunatsinnut iluaqutaasut pingaaruteqartullu ataatsimoorlutik 2019-miilli iluatsissimallugit, taanna isumaqarpoq.
Naammassisat suleriuserlu isumaqatigiinngissutaasut
Aaja Chemnitzip partiit taakku marluk angusaqaqatigiilluarsimanertik isumaqatigaa.
IA-meersulli oqarnera naapertorlugu naammassisaqarniarnerit assigiinngilluinnartut aqqutigalugit taakku pipput. Toqqaannartumik oqaatigalugu: IA ulluinnarni Siumumit ilungersorneruvoq.
- Oqartoqarsinnaavoq Folketingimi suleqatikkalu allaanerusumik ilungersoriaaseqartaratta, Aaja Chemnitz oqarpoq.
Taassumali qanimut suleqatigiinnissaq aamma Siumumut ammaffigiuaannarlugu erseqqissaatigaa.
- Suleqatigiinnissamut ammajuaannarpunga, aammali uattulli ilungersortigisumik suleqateqarnissaq aamma pisariaqartippara. Nunarpummi pillugu ulloq unnuarlu sulivunga, Aaja Chemnitz oqarpoq.
Qinersinermi taaguunneqarnerit – Folketingimut qinersineq 2019
Folketingimut 2019-imi juunip tallimaani qinersinermi taaguunneqarnerit kisitsisaat imaapput:
Aki-Matilda Høegh-Dam, Siumut: Qinersisunit 3.475-init taaguunneqarpoq, tassa qinersisut 19,6 procentinit.
Siumumeersunut 6.063-it taaguussipput, taaguussinerillu tamarmik 29,5 procenteralugit.
Aaja Chemnitz, Inuit Ataqatigiit: Qinersisunit 5.669-init tassa qinersisut 27,6 procentiinit qinerneqarpoq.
Inuit Ataqatigiit katillugit 6.867-init taaguunneqarput, taakkulu qinersisuy 33,4 procenteralugit.
Paasissutissarsiffik: Valg.gl
Taakkua sulinerisa assigiinngissusaat pillugu IA-p qinigaaffimmi matumani Folketingimi ataatsimiititaliami danskit ministeriinut apeqqutit ukiumut 100-init amerlanerusut apeqqutigisimagai oqaatigaa. Apeqqutit akissutillu Folketingip nittartagaatigut kikkunnit tamanit atuarneqarsinnaapput.
Danskilli ministeriinut Folketingimi Siumumit tamanut ammasumik apeqqutit ikittunnguusut, IA-meersoq isumaqarpoq.
Taassuma Aki-Matilda Høegh-Damip Socialdemokraatit folketingimi gruppianniikkami suliassat socialdemokraatinit ministerinut oqaloqatigiinnissutigisarmagit isornartorsiorpaa. Tassa imaappoq Siumut Socialdemokraatinut nukaasutut ikkami Socialdemokraatit sapaatip akunnikkaartumik gruppianni ataatsimiinneranni peqataasarpoq.
Tamannalu Siumup sulineranik matoqqasuulersitsisoq, Aaja Chemnitz isumaqarpoq.
- Tamanna assigiinngilluinnartumik suleriaaseqarnitsinnut assersuutissaalluarpoq. Uannut apeqqutit tamakkua danskit partiianik matoqqasumik ataatsimiilluni oqaluuserinagit tamanut iluaqutaasussamik saqqummiunneqartarnissaat pingaartuuvoq.
IA-mit politikerip qinigaaffimmi kingullermi Folketingimut ilaasortaasimasoq Siumumeersoq, Aleqa Hammond qanoq suliaqartiginera pillugu aamma isornartorsiorpaa. Tamanna nittartakkatigut tusagassiorfik Altinget aqqutigalugu pivoq.
Ataatsimiititaliamut apeqqutit amerlassusaat aallaavigalugu suliaqassuseq nalilerneqarsinnaava?
- Uannut kalaallit partiianik suleqateqarnissaq pingaartuuvoq, danskit partiivisa gruppiisa ataatsimiinneranni peqataaneq ajorama. Uanga uagut nammineq gruppitsinni ataatsimiittarpunga, kalaallillu politikkiannik suliaqarlunga, pissutigalugu kalaallit qinersisartut soqutigisaat siullertut suliarisarakkit. Tassunga taama oqarsinnaavunga.
Siumut: Socialdemokratinut toqqaannartumik atassuteqarneq nunatsinnut iluaqutaavoq
Ataatsimiititaliamili danskit ministeriinut apeqqutit amerlassusaat Aki-Matilda Høegh-Damip Aaja Chemnitzimit suliakinneruneranut uppernarsaataanngitsut, Siumumeersoq oqarpoq.
IA-li Siumullu Christiansborgimi politikikkut sulinerminni assigiinngitsunik suleriuseqaannarput.
- Politikki oqaluuserigaangatsigu sunniinissamut pineqartarpoq. Socialdemokraatit gruppiannut toqqaannartumik attaveqarnikkut pitsaanerpaamik sunniuteqarniarsarisugut isumaqarpunga. Marlunngornerit sisamanngornerillu tamaasa gruppimi ataatsimeeqatigigaangatsigit oqarsinnaasarpugut: ’Uku sulissutigerusuppagut’, Aki-Matilda Høegh-Dam oqarpoq, nangillunilu:
- Suliniutitta arlaannaalluunniit isertuganngillat. Taakku Folketingimi ataatsimiittarfimmi aamma oqaluuserisarpagut. Kisianni ministerinut qanillinissarput ajornannginneruvoq, tamannalu nukiuvoq, pingaartumik tamatta partiinit socialdemokraatiskineersuutilluta.
Taassuma Siumup IA Folketingimi suleqatiserisarsimanerarpaa, assersuutigalugu Kalaallit Nunaannut tunngasunut ataatsimiititaliami siulittaasuuffiup 2019-imi qinersinerup kingorna avinneqarnissaanut.
Folketingimi amerlanerussuteqartut Siumup siulittaasuuffeqarnissaa tassani toqqarnikuuaat. Atuuffilli nunatsinni qinersisartut akornanni siammasissumik takussutissiiffiuniassammat ukiunut marlukkaarlugu Siumut IA-llu akornanni avinneqarpoq.
Aaja Chemnitzip oqaaserisai ”qineqqusaarnermik aallartinnermi pissusissamisuunngitsut” Aki-Matilda Høegh-Dam isumaqarpoq.
Aaja Chemnitz aamma Aki-Matilda Høegh-Dam Folketingimut novembarip aallaqqaataanut qinigassanngorteqqipput.