Nunatsiavummi ikiuigasuariartartut Sheshatshiumut ullualuit matuma siorna tikiupput.Assi: Flickr

Nunatsiavut indianerit illoqarfiannut ikiuiniartoq

Indianerit nunaannarmi illoqarfianni imminut toquttut amerlangaatsiarmata Nunatsiavut ikiuigasuariartorput.

Indianerit nunaannarmi illoqarfianni, Sheshatshiumi imminut toqunnerit tuniluunnerannik taaneqarsinnaangajattumik amerliartorput.

Nunaannarmi illoqarfik pinasuartumik ikiueqqussuteqarpoq, Nunatsiavullu ikiuigasuariartorpoq.

Sheshatshiumi naggueqatigiinnit innunit niviarsiaraq inuusuttoq sapaatit akunneri marluk matuma siorna imminut toquppoq. Sapaatip akunnera qaangiuttoq inuusuttut allat qulit imminut aamma toqoriaraluarput, iluatsinngilaalli.

AAMMA ATUARUK Suliniutissatut pilersaarutip nutaap imminut toquttarneq pinaveersaartissavaa

Tamanna pissutigalugu høvdingip, Eugene Hartip nunaannarmi illoqarfik ajornartoortoqarneranik nassuerutigaa, Nunatsiavummilu naggueqatigiit inuit ikiueqqusineq tusaallugu ikiuiniarlutik aalajangerput.

Ikiuunneq nunap inoqqaavisa nukinganik takutitsisoq

Nunatsiavummi ikiuigasuariartartut Sheshatshiumut ullualuit matuma siorna tikiupput, taakku April Andersenimit siulersorneqarput.

Naak naggueqatigiit inuit innut indianerillu assigiinngitsumik piorsarsimassuseqaraluartut assigiissuteqartorujussuupput, tamarmillu ammip qalipaataanik immikkoortitsineq imminut toquttarnerlu ilisimasaqarfigigaat, April Andersenip oqaatigaa.

AAMMA ATUARUK Imminut toquttarnerup nuna tamakkerlugu ajornartorsiutaanera nassuerutigeqqugaa

- Immitsinnut ikioqatigiissinnaanerput nunap inoqqaavisa nukittuffiinik takutitsivoq, April Andersen oqarpoq.

Allatigut aamma ikiuisoqarpoq, ikiuigasuartarfik piffissami matumani ullormut akunnerit 24-t ammatinneqartarpoq, tassanga inuusuttut nakkutigineqarput allanillu imminut toquttoqarnissaanut pinaveersaartitsisoqarluni.

Sheshatshiu Nunatsiavup kujataaniippoq 1200-nilli innuttaasoqarluni, innuttaasut affaat sinnerlugit inuusuttuupput 25-t ataallugit ukioqartut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat