Nunat inoqqaavisa pisinnaatitaaffii Canadami inatsisiliunneqarnissaat qulakkeerneqangajalersoq
Partiiminnimi tassa New Democratic Partymi siulittaasup, Jagmeet Singhip, Nunavummut tikeraarnissani Mumilaaq Qaqqamut neriorsuutigaa.
Mumilaaq Qaqqap nunat inoqqaavisa pisinnaatitaaffiisa Canadami inatsisiliunneqarnissaannut sorsuuteqarneranut Jagmeet Singh aamma tapersersuisuuvoq.
Aammattaaq Ilumoortussaq Saammaasseqatigiinnissarlu pillugit Isumalioqatigiissitap aammalumi Nunap Inoqqaavisa Arnartaat Periarfeerussat Toqutaasimasullu pillugit Misissuinermut Isumalioqatigiissitap innersuussuterpassuisa piviusunngortinnissaat ilimanaateqarlualerpoq.
AAMMA ATUARUK Arnat toqutaasimasut pillugit nalunaarusiaq piareertoq
Mumilaaq Qaqqaq oktobarip ulluisa 21-anni qinerneqareernerminili ulapittuarsinnarpoq. New Democratic Partymeersuuvoq, partiilu taanna saamerliuniartuusoq inatsisartunut qinersinermi kingullermi 24-nik ilaasortaatitaqalerpoq.
Mumilaaq Qaqqap partiiminni siulittaasortik, Jagmeet Singh, qinersisoqareersorlu qasseeriarluni ataatsimeeqatigisimaginni Nunavik Newsimut oqaatigaa. Jagmeet Singhillu Nunavummut tikeraarfiginikuunngisaannakkaminut tikeraarnissi aamma neriorsuutigaa.
Jagmeet Singh sikhiusoq naggueqatigiinnut ikinnerussuteqartunut ilaavoq. Taassumalu nunat inoqqaavinnik politikkikkut suleqateqarnissi taakkulu pillugit politikkikkut angusaqarnissi pingaartittorujussuugini Global Newsimut oqaatigaa. Taassuma Naalagaaffiit Peqatigiit nunat inoqqaavisa pisinnaatitaaffii pillugit nalunaarutaat Canadami inatsisiliunneqarnissaata qulakkeernissaa aamma neriorsuutiginikuuaa.
AAMMA ATUARUK Ataatsimiititaliarsuup Quebecimi tusarniaanini naammassigai
Tamatuma saniatigut Ilumoortussaq Saammaasseqatigiinnissarlu pillugit Isumalioqatigiissitap aammalumi Nunap Inoqqaavisa Arnartaat Periarfeerussat Toqutaasimasullu pillugit Misissuinermut Isumalioqatigiissitap innersuussuterpassuisa piviusunngortinnissaannik qulakkeerinninnissi neriorsuutiginikuuaa.
Mumilaaq Qaqqap pisinnaatitaaffitsik inatsisiliunneqarnissaat sivisuumik sorsuutigai, nunammi inoqqaavisa arnartaasa sinniisuattut Canadami inatsisartut taakkorpiaat pillugit 2017-imi oqalugiarfigai.
AAMMA ATUARUK Nunavummiu inuusuttoq Canadami inatsisartunut qinerneqartoq
Mumilaaq Qaqqap Jagmeet Singhimik suleqateqalerneratigut pisinnaatitaaffiit taakku inatsisiliunneqarnissaannut siunnersuutip Canadami inatsisartunut oqaluuserisassanngortinneqarneranik kinguneqartussanngorpoq.
Inatsisartuni ilaasortatut qaammatip tulliuttup ingerlanerani oqalugiarngaassaaq.