Nunavummiu inuusuttoq Canadami inatsisartunut qinerneqartoq
![](/sites/default/files/styles/image_934x467/public/article_images/mumilaaq.jpeg.jpg?itok=vVC7fHh7)
Canadami ataasinngornermi qinersisoqarnerata inerneratigut Nunavut nutaamik inatsisartuniittuuteqalerpoq. Mumilaaq Qaqqaq New Democratic Partiimeersoq qinerneqarpoq. Inatsisartunut ilaasortanngoqqammersoq inernerit naammassineqarnerisa kingorna KNR-imit naapinneqarami tupinnanngitsumik nuannaaqaaq.
- Pissanganartorujussuuvoq, inuillu taama amerlatigisut uannut tatiginnillutillu tapersersuinerat nuannaarutigisorujussuuara, naak 25-nnarnik ukioqaraluarlunga qinersinermi unammillernartutut taaneqaqqippunga, Mumilaaq Qaqqaq oqarpoq.
Siuariarnissami naalakkersuisunit tapersiisoqartariaqartoq
Taassuma Canadami nunap inoqqaavisa inatsisartuni oqallisigineqartussani ilaatinniarneqartarneranut unammillernartorpassuit sulissutiginiarlugit erseqqissaatigaa.
- Ingerlariaqqissinnaanissatsinnut iluatsitsinissatsinnullu ikiorneqassaagut, naalakkersuisunilu sulinermi tamanut ammasumik ataqqinnittumillu atassuteqassaagut.
AAMMA ATUARUK Trudeau qinersinermi ajugaasoq qujassuteqarpoq: Siumukarnissamut qinersivusi
Naak Trudeaup nunap inoqqaavinut atassuteqarneq kissalaartumik oqallisigigaluaraa Mumilaaq Qaqqap aalajangersimasumik pitsanngoriaateqarsimanngissoraa.
- Nunavut Canadami naalakkersuisunit piffissami sivisuallaarujussuartumi qimarratigisaasutut misigisimapput, canadamiusut allatulli tiguneqarnissatsinnut sullinneqarnissatsinnullu piffissanngorpoq.
Nunatsinni unammillissutaasut aamma unammillissutigigaat
Nunavummi innuttaasut maani nunatsinni ajornartorsiutaasut amerlasuut assingannik unammissuteqarput.
Nunarsuarmi imminut toquttartut amerlanerpaanerat, inuussutissanik amigaateqarneq, inissaaleqineq meeqqat utoqqaallu paaqqutarineqarnerlunnerat kiisalu sumiiffimmi timmisartumik kisimi tikinneqarsinnaasuni angalanissamut akit qaffasippallaarnerat ilaatigut ajornartorsiutigineqarput.
- Nunavummiut amerlavallaarujussuartut naggueqatigiillu inuit nunani siuarsagassani ilaasutut inuupput tamannalu nunatsinnut akuersaarneqarsinnaanngilaq. Taamaammat suliassarpassuaqarpoq.
AAMMA ATUARUK Trudeau kisiartaalluni Canadap issittortaanut tikeraartoq
Ataasinngornermi qinersisoqarnerani Justin Trudeaup taassumalu partiiata amerlanerussuteqarnertik annaavaat, taamaammat ikinnerussuteqartumik naalakkersuisuutitaqarnissamut partiimik tapersersortissarsiussaaq. Maannalu Mumilaaq Qaqqap partiia New Democratic Parti siullertut toqqarneqarpasippoq.