Trudeau qinersinermi ajugaasoq qujassuteqarpoq: Siumukarnissamut qinersivusi

Justin Trudeaup partiiatalu Liberalit ippassaq inatsisartunut qinersisoqareersorlu naalakkersuisuutitaqarnertik ingerlatiinnarsinnaanngunarunarpaat.

Naak Canadami ministeriunerup, Justin Trudeaup, partiia kinguariaraluartoq, nunami siuttutut ingerlaannarnissaa ilimanaateqarsinnaavoq.

Canadamiut tatiginnillutik qinersisimanerannut unnuaq qujassuteqarfigai.

- Canadami Ottawami qinersisoqarluarsimanerata kingunerisaanik qinersinermi taama inissippugut, Trudeau qujassuteqarluni taama oqarpoq.

47-nik ukiulik ilinniartitsisutut sulisuusimasoq, Canadami politikikkut ukiut kingulliit sisamat sunniuteqarsimaqaaq. Qineqqusaarnerlu kingulleq pillugu naliliigami oqarpoq qineqqusaarneq assoralissimaarnarlunilu nunap oqaluttuarisaanerani sakkortuuliorfiusimasoq.

Trudeaullu qineqqusaarnerup naggataatungaani qinersisartunut kaammattuutigalugu arlaleriarlugu oqaatigaa, angunni, Pierre Trudeau. Trudeaummi angutaa 1970-kkunni ministeriunerusimavoq, taamaanikkullu Canadami ilaatigut ineriartornermut politikikkut siuttuusimalluni.

Inatsisartunut ippassaq qinersimermi inernerit naapertorlugit tassa Trudeaup partiia Liberalit, ikinnerussuteqarlutik naalakkersuisunngortitsisariaqassagunarput.

Partiimmi amerlanerussuteqarnissamut inatsisartuni inissat 170-t pissarsiarinngilai

taakkumi sinnersimagaanni aatsaat amerlanerussuteqarluni naalakkersuisunngortitsisisoqarsinnaavoq.

Canadami qinersisinnaasuni 27,4 milliuuniusuni 65 procentingajaat qinersisimapput.

Inatsisartuni arnat 97-it ilaasortanngortussanngorput tamannalu rekordiliineruvoq.

Trudeau naalakkersuisunngortitsinissamut partiit illuatungiliuttut mikinerit suleqatigisariaqassavai.