Nunarput nunanik sanilerisaminik niueqateqarnerussaaq
- Isumaqarpunga ukiup ataatsip ingerlanerani niuernikkut suleqatigiiffik Islandip, Savalimmiut Kalaallit Nunaatalu pingasuullutik peqataaffigisaat pilersinneqarsinnaasoq, Lars-Emil Johansen oqarpoq.
Nunat avannarliit killiit siunnersuisooqatigiivi tassaapput Savalimmiut, Islandimiut Kalaallillu soqutigisamikkut suleqatigiinnerulernissaannik nunani taakkunani Inatsisartut naapittarfiat.
Ilaatigut uumassusilinnut, uumaatsunut nakkutilleeqatigiinnissaq kulturikkullu suleqatigiinnissaq siunertaavoq. Siunnersuisooqatigiit ukiumut marloriarlutik ataatsimiittarput.
Ukiumut tulliuttumut pilersaarutit
Aporfeqanngitsumik killilersugaanngitsumillu niueqatigiissinnaaneq aammalu inuussutissarsiornermi ingerlatsisut suleqatigiiffiannik siunnersuisoqatigiiliortoqarnissaa inassutigissallugu aalajangiuppaat. Taamalu inassuteqarneq Nunatsinni, Islandimi Savalimmiunilu inuussutissarsiortut ilaannit, ataatsimiinnermi peqataasunit, ilalersorneqarpoq.
- Taakkua soqutiginninnerat naapertorlugu, isumaqarpunga kalaallit, islandimiut savalimmiormiullu namminerisaminnik niuernikkut suleqatigiiffissaat ukiup ataatsip ingerlanerani pilersinneqarsinnaasoq, Lars-Emil Johansen KNR-imut oqarpoq.
Nunatta, Islandip Savalimmiullu akornanni ataatsimut suliniaqatigiiffeqanngilaq. Nunarput Islandilu, Savalimmiut Islandilu taakku immikkut niueqatigiinnermik isumaqatigiissuteqarput, ataatsimulli pingasuullutik suli niueqatigiinnissamik isumaqatigiissuteqanngillat.
- Aamma isumaqarpunga ukiup ataatsip ingerlanerani niueqatigiinnissamut isumaqatigissutissaq ilusilersorneqarsinnaasoq naalakkersuinikkut piumassuseqarfigineqarpat nunani taakkunani pingasuni, Lars-Emil Johansen oqarpoq.
