Nunasiaataasimanerput isiginnaagassiamik rockimik erinarsuusiartalissuarmik malunnartinneqassasoq

Rockimik erinarsuusiartalissuaq Nuummi kulturip illorsuani Kutuami sapaatip akunnerata naanerani isiginnaartinneqassaaq.

Isiginnaagassiaq "Palasi" palasimut Kalaallit Nunaannukarluni innuttaasunut sunniineranut Kalaallit Nunaannillu nunasiaatinngortitsisumut tunngassuteqarpoq.

Allatut oqaatigalugu isiginnaagassiap erinarsuusiartalissuup ajoqusersuiartortitap, nunasiaatinngorsaasup, Hans Egedep nunatsinnut 1721-mi tikinnera malunnartissavaa.

Palasi erinarsuummit ateqaqataanit Palasimit aallaaveqarpoq, erinarsuut taanna nipilersoqatigiinni Pitsukkunni siuttuusup Maasi Lyngep aamma Looqinnguaq Lameksenip taalliaraat.

Nunasiaataanerup nalaanit suli anniaateqartoq

Nipilersoqatigiinni Pitsikkunni nipilersoqataasarsimasoq Hans Peter Kleemann tusarnaartitsilluni isiginnaagassiornissamut isumassarsisuuvoq.

Hans Peter Kleemannillu isumassarsiani piviusunngortinniarlugu isiginnaartitsisarfiup ningiua, Susanne Andreassen attavigaa saqqummippaa.

Taassumalu Piitsukkut erinarsuusiaat ullumikkut suli soqutiginaateqartuusorai. Erinarsuutimmi namminiilivinnissamut oqallinnermut aamma nunatta Danmarkillu atassuteqarnerannut tapersiisarput.

- Nunasiaataasimanermit pisut oqaluuserineqarnissaat pingaaruteqarpoq, ukiummi 300-t qaangiutereeraluartut suli takussutissaqarpoq, Susanne Andreassen oqarpoq, nangillunilu:

- Nunasiaataasimanermit suli anniaateqarpoq, taamaattumik oqaluuserineqarnissaat ukkatarineqarnissaallu pingaaruteqarpoq ungasinnerusoq eqqarsaatigalugu qaangerneqassamata.

Takuteqqaarneqarnissaanut sinissaaleqisoq

Hans Peter Kleemann tusarnaartitsilluni isiginnaagassiap Palasip siullermeerlugu arfininngornermi isiginnaartitsissutigeqqaarnissaata tungaanut unnuakkut makittariaqartarpoq.

Taassumami nipilersoqatigiinni Piitsukkunni taalliortoq erinarsortorlu maanna toqoreersoq eqqarsaataaniippoq:

- Minnerunngitsumik taalliortunnguarput erinarsortunnguarpullu, Maasersuaq eqqaallattaasaqattaaqaara, qularutiginngiivillugulu qanoruna tapikka imaluunniit sumiikkaluarnerpa, qungujuttaqattaaraangami, inequnaaluk, qungujuttartoruna tassa isaarutiviilluni, Hans Peter Kleemann ikinngutini Maasi Lynge 1986-mi toqusoq pillugu oqarpoq.

Palasi isiginnaartitsisarfiup aaqqissuussarisimasaani anginerpaassasoq Susanne Andreasenip oqaatigaa.

Rockimik erinarsuusiarsuartalik arfininngorpat nalunaaqutaq 14.30 kiisalu sapaatiuppat unnukkut nalunaaqutaq 19.30 isiginnaartinneqassaaq.

Isiginnaagassiap isiginnaarnissaanut billetti Katuap nittartagaatigut pisiarineqarsinnaapput.