Nunarput U18-it nunarsuarmi pissartanngorniunneranni Danmarkimut ajorsangaatsiartoq
![](/sites/default/files/styles/image_934x467/public/2024-08/CHN-GRL_7.png?h=6a28befc&itok=HqJI6fJ4)
Arnat U18-ini assammik arsarnermi unammisaartut Kinami Chuzhoumi nunarsuarmi pissartanngorniunnermi nunatta nalunaaqutaa malillugu ullaaq unammipput.
Kalaallit assammik arsartartut inuusuttut Danmarkimeersut ullumikkut unammivaat, danskinulli 42:8-mik ajorsarput.
Danskit unamminerup minutsini siullerni sakkortuumik aallartitsillutik pingasunik isertitsipput. Tamatumalu kingorna Madeline Bjørnstad isertitsivoq, nunarpullu ataaseraartillugu.
Danskilli unamminermi siuaqqapput, unamminermilu unikkallarnermi danskit 20:5-imik siuaqqallutik.
Arfininngorpat unammeqqissasut
Unamminerup aappaa assinganik ingerlavoq, ilisimaneqartutullu nunarput ajorsangaatsiarluni.
Nunatsinneersunit Madeline Bjørnstad isertitsinerpaalluni sisamanit isertitsivoq.
Danmarkimeersuniillu Andrea Bjertrup Jensen arfinilinnik isertitsilluni isertitsinerpaalluni.
Unammineq Kalaallit Nunaat vs Danmarki uani takoqqiuk.
Kalaallit arnat assammik arsartartut arfininngorpat Kinesisk Taipeimut unammissapput.
Unammineq nunatta nalunaaqutaa malillugu 09.00 aallartissaaq, tamannalu nunat tamalaat akornanni assammik arsarnermi kattuffiata youtube-iatigut malinnaaffigineqarsinnaalluni.
Nunarsuarmi pissartanngorniunnerit tamarmik Viaplayikkut imaluunniit nunat tamalaat akornanni assammik arsartartut kattuffiata Youtube-iatigut malinnaaffigineqarsinnaapput.