Nunatta Savalimmiullu ministeriuneq kamaakkaat
![](/sites/default/files/styles/image_934x467/public/article_images/20191203-202453-l-1920x1306we.jpg?itok=Ry21qAGO)
Nunarput Savalimmiullu ministeriunerup, Mette Frederiksenip (S) amerikamiut præsidentianik, Donald Trumpimik Londonimi Nato-mi pingasunngornermi ataatsimiittoqarnerata nalaani ataatsimeeqateqarnerani ilaasariaqaraluarput.
Inuit Ataqatigiit sinnerlugit Aaja Chemnitz Larsen Savalimmiuniillu Sjúrdur Skaale Javnaðarflokkurin sinnerlugit ilaasortat taama isumaqarput.
Ataatsimiinnermi nunatta Issittullu ilaatigut oqallisigineqarnissaa matumani ilaatigut pissutaavoq, tamanna issittumi nakkutiginninnerulernissamut tunngasoq danskit naalakkersuisuisa 1,5 milliardit koruuninik aningaasaliiffigeqqammilluinnarpaat.
AAMMA ATUARUK Ministeriunerup Trump ataatsimeeqatigileruniuk Kalaallit Nunaat ilaatigut oqaluuseriniarpaa
- Danskit ministeriunerat Naalagaaffeqatigiinnut danskit tungaanniit peqataalluni kisimiinnginnissaa aammali Kalaallit Nunaannit inuiaqatigiinnit qinikkat peqataanissaannut ataqqinnissuseqarnissaq pingaaruteqarput, Inuit Ataqatigiinnit, Aaja Chemnitz Larsen Jylland-Postenimut oqarpoq.
Københavnimi ataatsimiinnissaq taamaatinneqartoq
Mette Frederiksenip Donald Trump Issittoq pillugu Københavnimut tikeraarnerani oqallisiginninnissaa aallaqqamamut pilersaarutaagaluarpoq, tamannali nunatsinnik pisinissamik neqerooqqammitsiartoq taamaatiinnarneqarluni.
Ataatsimiinnissamut tassunga nunarput Savalimmiullu ataatsimiiffissamut qaaqquneqarsimagaluarput.
Danmarkip nunattalu Isumaqatigiissut Itilleq 2003-mi atsioreernikuusaat Danmarkip nunatsinnut tunngatillugu nunanut allanut oqallisiginninnissaanut nunatta ilaatinneqartarnissaanut tunngavoq.
Savalimmiut Danmarkilu assingusumik aamma isumaqatigiissuteqarput, taanna nalunaarut Fámjinimik taaguuteqarpoq 2005-imilu isumaqatigiissutaalluni.
AAMMA ATUARUK Immikkut ilisimasalik: Issittumi nakkutiginninnissamut milliardinik atuiniarneq isumatsialaavoq
Javnaðarflokkurinimit Folketingimut ilaasortap, Sjúrdur Skaalep Savalimmiut Londomi ataatsimiinnissamut ilaatinneqannginnera aamma eqqarsarnartoqartippaa.
- Ajuusaarnarpoq. Paasisinnaanngilara sooq. Tunngavilersuutaa ilisimanngilara, Issittorli oqallisigineqartussani pingaarnerpaaguni tamanna immikkut ittuuvoq, Sjúrdur Skaale Jyllands-Postenimut oqarpoq.
Danskit nunanut allanut tunngasunut ministeriata, Jeppe Kofodip (S) Washingtonimut novembarimi ataatsimeeqatigiinnikkiartornermini kalaallimik naalakkersuisumik ilagisaqarnera Naalagaaffeqatigiinni nutaatut pitsaanerusutullu taaneqarpoq tamannalu kalaallit politikeriinit nersualaarnerneqarluni.