Nunarput pillugu Venstremi avissaartuupput
Birthe Rønn Hornbech Kalaallit Nunaannut tunngassuteqartunut piffissaq qanittunnguaq tikillugu partiimi oqaaseqartartuugaluarpoq. Partiilli Kalaallit Nunaannut maannakkorpiaq isumaanut akerliulluni oqaaseqartartuujunnaarnissani qinerpaa.
- Kalaallit Nunaat pillugu isumaga gruppeqatima massakkorpiaq tapersersunngimmassuk oqaaseqartartuujunnaarnissara qaammatit marlussuit matuma siorna qinnutigaara, aviisimut Politikenimut e-mailikkut taama allappoq.
Namminersorneq pillugu inatsit 2009-mi akuerineqarnialermat Venstre pingaaruteqarluinnartumik akuugaluarpoq, taamaattorli suliniutit angisuut pillugit inatsit Venstremi siulittaasup, Lars Løkke Rasmussenip, aningaasarsiornermullu siusinnerusukkut ministerip, Claus Hjort Frederiksenip, sapaatip-akunnerini kingullermi assorsuaq isornartorsiorpaat, oqarlutik " inatsit taanna pillugu assorsuaq ernumallutik", Venstre Konservativillu malinnaasimannginnerarlugit.
Nassuiaalli Birthe Rønn Hornbechip akerlilerpaa. Namminersorneq pillugu isumalioqatigiissitami nammineq taamani ilaasortaavoq, isumaqarlunilu pisuussutit uumaatsut pillugit isumaqatigiissutip kingunerisinnaasai Danmarkip ilisimaarilluinnarai.
Namminersorneq pillugu isumalioqatigiissitap suut tamaasa oqallisigisarpai. Aatsitassarsiornissaq nunanit allaneersunillu sulisoqarnissaq oqallisigisimanngikkivut oqartoqaraluarpat, tamanna ilumuunngilluinnarpoq. Oqallisigaavummi. Ministeriuneqarfimmeersunillu aamma Inatsisinik atortitsinermut ministereqarfimmeersunik paasisimasaqarluartunik atorfilinnillu aamma peqataasoqarpoq.
- Kalaallit Nunaata pingaartitaa pillugu naalakkersuisut ilisimasaqarluarput: tassa aatsitassarsiornissaq, Birthe Rønn Horbech aviisimut Politikenimut allappoq.
