Nunarput ilinniarsimasunik pisuunnguallappoq

Ester Sommer ilinniartitsisutut allagartartaartut 31-iusunit 5.000 koruuninik aningaasartalinnik  kajumissaaserneqarpoq.
Taanna ilinniarnermini kajumissutsiminik suliaqartarpoq, aammalu intsitutrådimut ilaasortaasimalluni.
 
Kajumissaaserneqarninilu nammineq ima eqqaavaa:
- Pilluarnaq, pilluarnaqaaq.

Ester Sommer taama oqarpoq, taana ilinnialernerminiit naammassinissami tungaanut aqqutaa sukataarnarsimaqisoq nangilluni ima oqarpoq:

- Qummut ammullu, ullumikkut nuannaarujussuarpunga, ilinniartitsisutut allagartartaartoq Ester Sommer taama oqarpoq.
Taanna Maniitsumi ilinniartitsisutut atorfinereersimalluni oqarpoq. 

Ilisimatusarfimmi rektori angajoqqaat, ilaquttat, kammalaatillu allagartartaartumut najuunneranni ilinniakkamik naammassinnittut saallugit ima oqarpoq:

- Ilinniarnisili tamaannga killeqanngilaq, tassami massakkut ilinniarsimasut silarsuaannut appakaatissaasi ilinniarnisilu ingerlateqqillugu. Inuunermi ilinniartuarneq inuunissinnut pisuunngortitsiuassooq, Gitte Adler Reimer taama oqarpoq.

Taassuma bachelorinngortut 58-it kandidatitullu naammassisoq ataaseq ullumikkut allagartartaarneranni oqalugiarfigai.
Nunattalu ilinniarluarsimasunik pisuunnguallannera aamma persuarsiutigaa.
- Allagartartaartusi tamassi angusassinnik kusanartumik pilluangaaritsi. Kalaallit Nunat pilluarit ullumikkut ilinniagartuunik nutaanik pikkorissunik pisuunnguallatsitaagatta, Gitte Adler Reimer oqarpoq.

Taamaalillutik Ilisimatusarfimmi ilinniakkaminnik naammassinnittut  ukioq manna, tassa februarimi aammalu ullumikkut bacheloritut naammassisut katillutik 100-uupput, kandidatinngortut arfineq marluk kiisalu masterinngortoq ataaseq.