Nunarput akerlerineqarpoq
Arfanniartarneq pillugu akerliuneq, Danmarkimi ministeeriaqarfiup allakkatigut kisimi takuneq ajorpaa. Aamma Nunatsinni takornariaqarnermut inuussutissarsiornermullu siunnersuisooqatigiit, arfanniartarnermut akerliusunit 1000-init allagarsisarsimavoq, taama aviisi Sermitsiaq ullumi saqqummersoq allappoq.
Pingasunngormat radioavisimi oqaluttuaraarput, Danskit ministeriunerat Anders Fogh Rasmussen, allakkasuaatitigut akerliussunit allagarsisartoq.
Aningaasarsiutigalugu arfanniartarneq akerleralugu,, Greenpeacemi ilaasortat 7000-eriarlutik Statsministeeriaqarfimmut naammagittaalliortarsimapput, tuluillu uumasunik illersuiniaqatigiiffiat ataaseq, Londonimi Berlinimilu Danmarkip aallartitaqarfiinut 6000-erluni allassimalluni.
junip qaammataani IWC-p ataatsimeersuarnerani, aningaasarsiutigalugu arfanniartarneq taasissutigineqarmat, Danmark akuerseqataavoq, tamannalu Danmarkimi inuppassuarnit nunanilu allani akerlerineqarpoq.
Kalaallit nunaata aamma kissaatigisimavaa, qipoqqarniaqqitalernissaq, tamannalu assersuutigalugu USA-mi nutaarsiassaqartitsiviup CNN-ip USA-mi innuttaasunut oqaluttuarigaluarpagu, Kalaallit nunaanni takornariaqarnermut ajoqusiisinnaasoq, Nunatsinni takornariaqarnermut inuussutissarsiornermullu siunnersuisooqatigiinneersoq Niels Feerup Sermitsiamut oqarpoq.
