Nunarput 800 millioner koruuninik atorniassaaq
Aningaasalli sapinngisamik ingerlatsinermut atorneqarnaveersaarneqartariaqartut, Maliina Abelsenimit erseqqissaatigineqarpoq - tassa nunatsinni attartortinneqarnissaminnut atorneqassapput, taamallillutik piffissaq ungasinnerusoq eqqarsaatigalugu isaatitsissutaasinnaanngortillugit, tassa siunissamut aningaasaliinertut isigineqartariaqarlutik.
Taakku 800 millionit koruunit 2012-imut, 2013-imut, 2014-imut kiisalu 2015-imut assigiiaarlugit agguataarneqassapput, taammaattumillu ukiut tamaasa 200 millionit koruuninik atorniartarnissaq pisariaqassaaq.
Taamaaliorneq aqqutigalugu Maliina Abelsenip qulakkeerniarpaa, pisuni tassanngaannartumik millionerpassuarnik amigaateqartoqaleraluarpat Nunatta Karsiata 650 millionit koruuninik patajaatsumik imaqartuaannarnissaa.
