Nunaqarfinni arlalinni ikuallaaveqanngilaq

Nunaqarfiit allat eqqagassalerinermik aamma ajornartorsiuteqarput. Akunnaami ikuallaavissap atulerneqarnissaanik noqqaassut ukiorpassuarni uteqattaarneqartuarpoq.

- Igalaat ammagassaarpiarneq ajorput. Angalaarsimalaariarluni tikikkaanni illup iluani tipersuaq uagutsinni allanilu aamma ajornartorsiutaavoq, Grethe Olsen oqarpoq.

Aamma atuaruk Utaqqiinnarsinnaajunnaartut: Eqqagassat piiarneqarlik

Tasiusami eqqagassalerineq aamma ajornartorsiutaasoq ippassaq oqaatigaarput. Ikuallaavissaq Akunnaap kippasissortaani Aasiaat Kommuniugallarmalli toqqammavilerneqarpoq, sulili atulinngilaq.

Naak noqqaassutigineqartuaraluarluni kommunimillu alakkarneqartaraluarluni.

Aamma atuaruk Nunaqarfiit ilaanni ulorianartunut eqqaavissaqanngilaq

- Kingullermik maaniittoqarmat, teknikkeqarfimmit oqaatigineqaraluarpoq eqqaavissuup atortussaanik tikittoqartussaasoq. Kisianni qaammatit tulleriiaappaat aaqqiissutaasinnaasunilluunniit suli takkuttoqarani, nunaqarfimmi eqqagassat pillugit kommuni upernaarmanna nakkutilliiartortitsisoq, Akunnaami nunaqarfimmik aqutsisoq Gerth Nielsen oqarpoq.

Aamma atuaruk Naalakkersuisut eqqaavissuarni saliisitsilersut

Kisianni eqqagassat Ikerasaarsummi Ikamiunilu aamma ajornartorsiutaaqisut taassuma oqaatigaa.

- Ikuallaavittut taagorneqartut nappartiternikorpassuit sinerissamiittut ilaatigut ulloq manna tikippaat suli naammassineqarnikuunatik, soorlu assersuutigalugu Ikamiuni napparsimagaluarpaat kisianni pisatassai ikussuunneqaratik asuli tamaani eqqumiiginnarmik napavoq, Gerth Nielsen oqarpoq.

Aamma atuaruk VIDEO Nunaqarfimmi eqqagassalerineq anartaajaanerlu ajornartorsiutaasut

Illoqarfinni ingerlatsinermut akisussaasut suleqatigalugit ajornartorsiut aaqqinniarneqartoq Qaasuitsup Kommunimit oqaatigineqarpoq.

- Taamaammat pineqartuni innuttaasut eqqakkatik qanoq iliortassanerlugit nalunnginniassammassuk attanneqarsinnaasumik aaqqiissutissarsiorpugut. Maannakkorpiarli aaqqiissutissaqanngilagut, Qaasuitsup Kommuniani Ingerlatsinermut Avatangiisinullu sulianut aqutsisoq Søren Lindenhann allappoq.