Utaqqiinnarsinnaajunnaartut: Eqqagassat piiarneqarlik
![](/sites/default/files/styles/image_934x467/public/article_images/5326907987_4c79dcfafc_o.jpg?itok=ZB9l-_OM)
- Eqqagarsuit eqqakkallu siornarnitsat amerliartuinnaramik illutsinninngaanniik immaqa meterinik tallimaanarnik ungasissuseqalerlutik, Tasiusarmioq Daniel Løvstrøm oqarpoq.
Illut eqqaanni eqqagassaganik annallu puuinik aasaq naallugu takussaasoqaqaaq, nunaqarfillu tippappoq.
- Sila kissakkaangat igalaalluunniit mappersimaneq ajornarsipput, niviugassuarnik, nunaqarfippullu tippakkami, Daniel Løvstrøm oqarpoq.
Aamma atuaruk Nunaqarfiit ilaanni ulorianartunut eqqaavissaqanngilaq
Tasiusami maajimili eqqaavilerisussaqarnanilu anartaajaalerissaqannginnera pillugu kommunip nunaqarfimmi allaffia Qaasuitsup Kommunianut naammagittaalliuuteqarpoq, sapaatillu akunnerini marlunni sulisussamik pissarsilluni.
Kisianni Sulisueroqqimmalli qaammat ataaseq qaangiussimalereerpoq.
- Sulisussaqanngilagut. Tamanna ernumanarpoq ajuusaarnarlunilu, nunaqarfinni Tasiusami, Nutaarmiuni Nuussuarmilu aqutsisut siulittaasuat Simon Sakariassen oqarpoq.
Aamma atuaruk Avatangiisinut naalakkersuisoq: Eqqaavissuit pitsaanerusumik ingerlanneqarsinnaapput
Tasiusamiinnarli eqqaavilerisumik amigaateqanngillat, aamma Nutaarmiuni siornali pissarsiortaraluarput, kinguneqanngitsumilli.
Nunaqarfinnilu aqutsisut namminersortumik ataavartumillu sulisinnaasumik pissarserusullutik Qaasuitsup Kommunianut noqqaapput.
Simon Sakariassen naapertorlugu suliffissamut qinnuteqartoqarpoq qinnuteqarnissarlu juulip ulluisa 29-annut killeqaraluarpoq, aqutsisulli suli tusagaqanngillat.
Eqqaavilerisunik pissarsiornissamik aaqqiissutaagallarsinnaasoq pillugu Tasiusami Nutaarmiuni Nuussuarmilu aqutsisut tallimaallutik aggustip ulluisa 16-ianni ataatsimeeqatigiissapput.
- Utaqqikatannarpoq, kommuni qinnuteqaat pillugu isummertariaqassaaq, Simon Sakariassen oqarpoq.
Qaasuitsup Kommuniani avatangiisit pillugit immikkoortortaqarfik suli oqaaseqartissinnaasimanngilarput.