Avatangiisinut naalakkersuisoq: Eqqaavissuit pitsaanerusumik ingerlanneqarsinnaapput
Aamma eqqaavissuit 2024-imi atorunnaarsinneqassasut imaluunniit nutaanngortillugit avatangiisit eqqarsaatigalugit akuerineqarsimasunngortinneqassasut, naalakkersuisoq oqarpoq.
Tamanna siunertaralugu eqqaavissuit pioreersut eqqakkanullu inissiivissanut nutaanut aqunneqartussanut tunngasunut Naalakkersuisut 2014-imi nutaanik malittarisassaliorput.
- Eqqaavissuit pitsanngorsarneqarnissaat ungasinnerusorlu isigalugu avatangiisit pillugit akuerisanik eqqaaveqalernissaa sulissutigineqartoq, eqqaaveqarneq pillugu pilersaarusiaq 2015-imeersumut innersuuteqarluni naalakkersuisoq akissuteqarpoq.
Aamma atuaruk Nunaqarfik alla eqqagassalerinermik anartaajaarnermillu aamma ajornartorsiuteqarpoq
- 2024 naatinnagu illoqarfinni nunaqarfinnilu eqqaavissuit tamarmik atorunnaarsinneqassasut imaluunniit inissiivinnut nakkutigisanut avatangiisillu pillugit akuerisanut allanngortinneqassasut, eqqagassalerinermi sanaartornermut pilersaarummi anguniagaasut ilagaat, naalakkersuisoq allappoq.
Pilersaarutilli tamakku qanoq akeqarumaarnerinik, naalakkersuisut maannakkut naatsorsuusiorsimanngillat.
- Maannarpiaq kommunit nunatsinni sumiiffinni assigiinngitsuni eqqaavissuarnik saliillutik ingerlapput, Mala Høy Kúko taama allappoq erseqqissarlugulu eqqarvissuit pillugit missingersuutit tatiginanngittuummata.
Kommunit saliinerminni misilittagaqalerpata, misilittagaa ukioq naalerpat nalilersorneqassapput missingersuusiortoqarlunilu.
Kommunit eqqakkat suliarinissaat piiarnissaallu akisussaaffigaat, namminnerlu avatangiisinut eqqarsaatigalugit pisariaqartitatik pilersittussaallugit. Aningaasanulli inatsit aqqutigalugu avatangiisit illersornissaannut atortussanik kommunit qinnuteqaateqarsinnaapput.
