Avatangiisit

ASSIT Nunaqarfik alla eqqagassalerinermik anartaajaarnermillu aamma ajornartorsiuteqarpoq

Nunaqarfik Illorsuit eqqagassalerinermik anartaajaanermillu ajornartorsiuteqartutuaanngilaq. Ikerasaarsummi eqqagassat illut eqqannguini eqqarneqartarput, anorillu nunaqarfimmut piffissami sivisuumi sammineratigut eqqaavissuaq qaammatini pingasuni ikuallanneqarsinnaasimanngilaq.

Allattoq Arnaq Nielsen, Camilla Dam

septembarip 11-at 2015 12:57

Allatut oqaatigalugu nunaqarfik tipittupilussuuvoq, Illorsuartullu aamma Qaasuitsup Kommunianiippoq.

- Massakkut juulimili ikinneqarami suli ikinneqaqqinngilaq, massakkunaasit ulikkaaqqavoq. Kiannerani quperlusunnersuaq, taavalu anasunni qorsunni. Tipilerujuusarpoq illut akornannut, taamannak piinnaleraangami ikinneqarani,
Nielsine Inûsugtok KNR-imut taama oqarpoq.

Eqqagassat peqqiilliutaasinnaapput.

- Anartarfiit bakteerialerujussuupput, taamaattumik nappaatit tuniluussinnaasut, naarluunnerit allallu tuniluuttarsinnaanerat ilimanaatilerujussuuvoq, nunatsinni nakorsaaneq, Flemming Kleist Stenz, taama oqarpoq.

Aamma atuaruk VIDEO Nunaqarfimmi eqqagassalerineq anartaajaanerlu ajornartorsiutaasut

Ikuallarujussuartoq
Illut akornanni eqqagassanik inissiisarneq peqqinnanngilaq. Anorillu illoqarfimmut samminera pissutigalugu eqqaavissuaq qaammaterpassuarni ikuallanneqarsimanngimmat, anori allamut saariarpat eqqaavissuarlu ikuallanneqalerpat ulorianarsinnaassaaq.

- Ataasiarlungami eqqaamavara ikuallakkamikku, sivitsuunnikuungaarmat ikuallannginnera, taava innilerujuugami uunaqangaarmat illu taanna ilanngullugu masatsertariaqarlugu, Nielsine Inûsugtok taama oqarpoq.

Aamma atuaruk Naalakkersuisut eqqaavissuarni saliisitsilersut

Kommunip neriorsuutigisani eqquutsissanerpaa
Nunaqarfiup eqqaavissuata salinneqarnissaanik kommuni pilersaaruteqarpoq, tamannali qaqugu pissanersoq nalunarluni.

- Aningaasat atorsinnaasagut killeqarput, eqqaavissuarli salinneqassaaq. Kisianni eqqaavissuup ukiuni tulliuttuni nuunneqarnissaanut aningaasassaqanngilagut, Jens Mikkelsen, Qaasuitsup Kommuniani sanaartornermut avatangiisinullu pisortaq taama oqarpoq.

Ikerasaarsummi eqqaavissuup aappaagu salinneqarnissaa kommunip neriorsuutigaa, taamatulli neriorsuisoqartarnera nunaqarfimmiut aatsaat tusalinngilaat.

- Sanasunik takuleruma aatsaat upperilerumaarpara. Massakkut sanasoqanngippat upperisinnaanngilakka, ukiorpassuit taamannak neriorsuiuarsimapput, Nielsine Inûsugtok taama oqarpoq.