Nunaqarfimmi inuusuttut ikorfartorneqarput

Nunaqarfinni inuusuttut siuarsarniarlugit ilinnialerusulernissaanillu tapersersorlugit suliniarfigineqaramik inuusuttorpassuit iluatsilluartumik piumassuseqalerput.
Nunaqarfinni illoqarfinnilu mikinerni inuusuttut ilinniarfissaaleqineq pissutigalugu pisortanit kingulliunneqartarput. Assi © : Najattaannguaq Mølgaard
Allattoq Søren Lyberth
oktobarip 26-at 2015 14:37

Aningaasaateqarfiup WillumFondenip siunertaq iluaralugu suliffeqarfeeqqamut NUIKImut 15 milliuuni koruunit missaannik aningaasaliivoq.
- Taamaasilluni Kommunit Namminersorlutillu Oqartussat iliuuseqarfigisinnaanngisaat naammassisinnaalerparput, Palle Lennert radiomi aallakaatitamut oqarpoq.

inuusuttunik kivitseqataasut nunaqarfinni qulit missaaniittuni ikorfaartuineranni inuusuttut iliuuseqarfigisat 80 procentii piumassuseqalersimapput.

- NUIKIp atuartitsinerup iluani kivitseqataanerata piumassuseqalerama Qaqortumi Campus Kujallermi ilinnialissaanga, oqarpoq Kullorsuarmiu Godmann Danielsen.

Aamma atuaruk Kinaluunniit ilinniagaqarsinnaavoq

Godmann Danielsen aamma oqaluttuarpoq atuaqatigisimasani amerlanerit suliffittaarlutillu ilinnialersimasut.

Suliniut 2010-mi Itillimi misilinneqaqqaarsimasoq nunatsinni nunaqarfinni arlalinni ingerlanneqarmat iluatsilluarpoq. Nunaqarfiit aqqaneq-marluk maanna anguneqarsimalereerput. Inuusuttut piumassuseqalersimasut qallunaat nunaanni ullut 14-nit angalatinneqartarput, peqataasartullu ilinniarfissaminnik periarfissaqarluarlutik ujaasisarput, amerlanerillu ilinnialertarput.

Aamma atuaruk Attaveqaatit atorlugit atuartitsineq misilerarneqarpoq

Kalaallit Nunaanni ilinniarfiit ikippallaaramik inuusuttut unittoortartut amerlapput, ikorfartorneqarnissaannillu pisariaqartitsisut amerlasuunngortarput, tamaammat ilinniarfiit nunatsinni ilanissaat isummerfigineqartariaqartoq Palle Lennert isumaqarpoq.

KNR-radiomi aalakkaatitaq "Nunaqarfinnii inuusuttut ikorfartorneqarput" knr.gl-mi tusarnaarneqarsinnaavoq.

Aamma atuaruk